بین الاقوامی سرمایہ کاری نے کامیابی دے ریکارڈ قائم کر دتے

مغربی ملکاں دے بائیکاٹ مگروں سعودی سرمایہ کاری کانفرنس وچ پہلے دن 50ارب ڈالر توں ودھ دے سمجھوتے

بین الاقوامی سرمایہ کاری نے کامیابی دے ریکارڈ قائم کر دتے
مغربی ملکاں دے بائیکاٹ مگروں سعودی سرمایہ کاری کانفرنس وچ پہلے دن 50ارب ڈالر توں ودھ دے سمجھوتے

ریاض (پاکستان پوائنٹ نیوز23۔اکتوبر۔2018ء) بین الاقوامی سرمایہ کاری نے کامیابی دے ریکارڈ قائم کر دتے۔مغربی ملکاں دے بائیکاٹ مگروں سعودی سرمایہ کاری کانفرنس وچ پہلے دن 50ارب ڈالر توں ودھ دے سمجھوتے۔ تفصیل مطابق اج سعودی عرب وچ بین الاقوامی سرمایہ کاری کانفرنس ہوئی۔ کانفرنس وچ پہلے دن 50ارب ڈالر توں ودھ دے سمجھوتے ہوئے۔ ایس موقعے تے عالمی سرمایا کاری کانفرنس وچ خطاب تے ایس توں بعد سوال و جواب دے سیشن وچ گلبات کردیاں ہویاں وزیراعظم عمران خان نے کہیا کہ پاکستان دی بنیاد پہلی اسلامی ریاست مدینہ دے اصول نیں۔

پاکستان دا مقصد افکار اُتے عمل کرنا اے۔ نویں پاکستان دا مطلب قائد دے اصولاں دے مطابق چلنا اے۔ اوہناں نے کہیا کہ نویں پاکستان وچ ادارایاں نُوں مضبوط کرنا چاہندے آں۔ ساڈی پہلی ترجیح برآمدات وچ وادھا اے تاں جے زرمبادلا ودھایا جا سکے‘ سانوں اقتدار وچ آیا 60 دن ہوئے نیں‘ سانوں فوری طور اُتے کرنٹ کسارے دے مسئلے دا ساہمنا اے‘ منی لانڈرنگ ترقی پذیر ملکاں وچ وڈا مسئلا اے‘ منی لانڈرنگ دے خاتمے لئی اقدامات کر رہے آں‘ سانوں تجارتی تے بجٹ کسارا ورثے وچ ملیا‘ قرضیاں دی ادائیگی لئی ہور قرضیاں دی ضرورت اے جہدے لئی آئی ایم ایف نال گل کر رہے آں جد کہ کوشش اے کہ دوست ممالک توں وی قرض حاصل کیتا جا سکے۔

کرپشن ملکاں وچ ادارے تباہ کردی اے تے کسے وی ملک نُوں غریب بناندی اے‘ اشرافیا بدعنوانی وچ ملوث ہوندی اے‘ ماضی وچ اداریاں دے رہنما منظور نظر بندیاں نُوں لایا گیا‘ بدعنوان لوکاں دے وڈی پوزیشن اُتے ہون کارن ادارے تباہ ہوئے‘ ساڈے کول اوہ قابل لوک نہیں جیہڑے وائٹ کالر کرائم نُوں پھڑ سکن‘ کرپٹ حکمران انسانی ترقی اُتے نہیں سگوں وڈے منصوبیاں اُتے سرمایا کاری کردے نیں‘ سانوں اپنے وسائل انسانی ترقی اُتے خرچ کرنا ہون گے‘ اسیں ملک وچ سرمایا کاری لئی موافق ماحول پیدا کر رہے آں تے برآمد کنندگان دی بہتری لئی اقدامات کر رہے آں‘ اسیں ٹیکساں دے نظام وچ وی اصلاحات کر رہے آں۔

عمران خان نے کہیا کہ ساڈے اگلے 3 توں 6 مہینے سخت ہون گے‘ مشکل حالات توں نکلن لئی اقدامات کر رہے آں جد کہ اسیں جو وی اصلاحات کراں گے اوہدا اثر آون والے دناں اُتے پوے گا۔ وزیراعظم دا کہنا سی کہ اگلے مہینے چین دا دورہ کر رہیا آں‘ چین نے 70 کروڑ بندیاں نُوں غربت توں باہر کڈھیا‘ اسیں چین توں سکھیا اے کہ غربت کس طرحاں گھٹ کردے نیں جد کہ چین نے کجھ ورھیاں دے دوران کرپشن دے خلاف وی وڈے پیمانے اُتے اقدامات کیتے‘ چین دی بہت وڈی مارکیٹ اے۔

اوہناں نے کہیا کہ سی پیک اِک بہت اہم منصوبا اے جیہدے تحت خصوصی اقصادی زونز بنائے جا رہے نیں‘ سی پیک دی پاکستان لئی وڈی اہمیت اے ایہدا ہر حال وچ دفاع کراں گے۔ نواں پاکستان ہاؤسنگ اسکیم دا ذکر کردیاں ہویاں عمران خان نے کہیا کہ پاکستان وچ اِک کروڑ گھراں دی کمی اے تے ایس منصوبے دے تحت ابتدائی طور اُتے 50 لکھ گھر اُسارے جان گے‘ جیہدے وچ غیر ملکی سرمایہ کاری دی وی امید اے‘ اوہناں نے ہو رکہیا کہ پاکستان مذہبی تے سیاحتی مقامات دی وجہ توں اہمیت دا حامل اے پر بدقسمتی نال اسیں اپنا راہ بھُل گئے‘ دنیا دے سبھ توں وڈے کوئلے دے ذخائر پاکستان وچ نیں‘ پاکستان وچ دنیا دیاں اُچیاں پہاڑیاں تے دلفریب قدرتی مناظر نیں جد کہ پاکستان وچ بدھ مت ورگی قدیم تہذیب وی اے‘ 60 دے دہاکے وچ پاکستان ایشیا وچ سبھ توں تیزی نال تقری کرن والا ملک سی پر افغان جہاد تے نائن الیون دے واقعات نال پاکستان بہت متاثر ہویا‘ پچھلے 15 ورھیاں وچ دہشتگردی دے ناسور نے پاکستان نُوں بہت نقصان پہنچایا جد کہ پاکستان دا جس جنگ نال کوئی تعلق نہیں سی اوہدے وچ 70 ہزار بندے جان توں گئے تے دہشتگردی دی ایس جنگ وچ جاناں دے نال نال سانوں 100 ارب ڈالر دا وی نقصان ہویا۔

وزیراعظم دا کہنا سی کہ بدقسمتی نال ماضی وچ پاکستان وچ انفارمیشن اینڈ ٹیکنالوجی دے شعبے اُتے توجہ نہیں دِتی گئی‘ ساڈی حکومت ہن آئی ٹی سیکٹر اُتے توجہ دے رہی اے‘ اسیں اپنے ملک وچ سوانیاں دی شرح خواندگی ودھانا چاہندے آں‘ خیبر پختونخوا وچ 5 سال وچ اسیں 100 وِچوں 70 کالج کڑیاں لئی مختص کیتے۔ مستقبل دے سرمایا کاری اقدامات دے عنوان نال اج توں شروع ہون والی اسی تِن دنا کانفرنس وچ 90 ملکاں توں 3 ہزار 800 مندوب شریک نیں۔