اسلام آباد(پاکستان پوائنٹ نیوز23۔اکتوبر۔2018ء) سی پیک گیم چینجر منصوبہ اے جو ملکی معاشی سطح اُتے مستحکم تے ملک نوں خشحالی و ترقی دیاں راہواں اُتے ٹورے گا۔ سی پیک منصوبے نال ملک وچ سرمایہ کاری 100ارب ڈالر تیکر ودھن دی آس اے۔ غیر ملکی سرمایہ کاری وچ وادھے نال ملک بھر وچ نویاں انڈسٹریاں دا قیام تے صنعتی ترقی دا خاب سچ ہوئے گا۔ماہرین دا آکھنا اے کہ مقامی صنعت دے تحفظ تے سی پیک دے تحت کیتی جان والی سرمایہ کاری دے نتیجے وچ لگن والیاں صنعتاں وچ مقامی کمپنیاں تے اداریاں دی رلت نوں ضروری قرار دتا جائے ،ایس عمل دے بہتر نتیجے برآمد ہون گے۔
سی پیک سیکرٹریٹ دے مطابق وفاقی حکومت دے ملک وچ سی پیک دے تحت قائم ہون والے اُچیچے(خصوصی) زونز وچ سرمایہ کاری لئی خصوصی پیکج دے تحت ڈیوٹی و ٹیکساں وچ خصوصی رعایت سنے ہور سہولتاں دین دا فیصلا کیتاگیا اے۔ سی پیک اقتصادی زونز وچ سرمایہ کاراں لئی خصوصی پیکج دے نتیجے وچ غیر ملکی سرمایہ کاری وچ وادھا ہوئے گا۔ ماہرین نے آکھیا کہ سی پیک صنعتی زونز وچ صنعتاں دے قیام لئی پاکستانی، چینی تے غیر ملکی سرمایہ کاراں نوں اِکو جہیاں سہولتاں تے نویں صنعتاں لان لئی خام مال تے پلانٹس و مشینری تے ہور آلات اُتے سرمایہ کاراں نوں ڈیوٹیاں تے ٹیکساں توں استثنا تے ریاعتی قرضیاں سنے خاص سہولتاں دتیاں جان۔
