لاہور(پاکستان پوائنٹ نیوز22۔اکتوبر۔2018ء) تحریک انصاف نوں (ق) لیگ دی بغاوت دا ساہمنا کرنا پے گیا،سپیکر پنجاب اسمبلی دے بھتیجے تے ایم پی اے حسین الہی نے حکومت نوں وارننگ دیندے ہوئے آکھیا اے کہ لوکائی دے مسائل چھیتی حل کرو نہیں تے احتجاج لئی تیار ہو جاؤ۔ تفصیل مطابق تحریک انصاف دی وفاقی تے پنجاب حکومت دیاں سیاسی اوکڑاں ہر آؤندے دن نوں ودھدیاں جا رہیاں نیں۔
جتھے پارلیمنٹ وچ موجود ساریاں اپوزیشن جماعتاں حکومت خلاف اکٹھیاں ہوگئیاں نیں،اوتھے ہن حکومت دی اتحادی جماعت(ق) لیگ وی باغی ہو گئی اے۔ تحریک انصاف نوں (ق) لیگ دی بغاوت دا اوس ویلے ساہمنا کرنا پیا جدوں سپیکر پنجاب اسمبلی دے بھتیجے تے ایم پی اے حسین الہی نے تحریک انصاف دی حکومت نوں وارننگ دیندے ہوئے آکھیا کہ لوکائی دے مسائل چھیتی حل کرو نہیں تے احتجاج لئی تیار ہو جاؤ۔
اپنے جدی حلقے گجرات وچ عوامی جلسے نال خطاب کردے ہوئے اوہناں نے آکھیا کہ موجودہ حکومت نوں یقینی طور اُتے کارکردگی وکھان لئی ویلا دینا چاہیدا پر اجے جو کُجھ ہو رہیا اے اوہ سبھ ویکھ رہے نیں۔ حکومت نوں غریب لوکائی ول ویکھنا پئے گا ، اوہناں دے مسائل چھیتی حل کرنے پین گے۔ اوہناں نے آکھیا کہ جے تحریک انصاف دی حکومت غریباں دے مسائل حل کرن ول توجہ نہیں دیندی تے فیر چُپ نہیں رہواں گے۔
