طاہر القادری تشویشناک حالت وچ ہسپتال منتقل، آپریشن مگروں حالت بہتر

لاہور(پاکستان پوائنٹ نیوز22۔اکتوبر۔2018ء) سربراہ عوامی تحریک ڈاکٹر علامہ طاہر القادری دے سینے اُتے پھوڑا نکلن دی وجہ توں اوہناں دا آپریشن کرنا پیا، آپریشن مگروں ڈاکٹر علامہ طاہر القادری دی صحت بہتر ہو رہی اے۔ تفصیل مطابق عوامی تحریک دے سربراہ علامہ ڈاکٹر طاہر القادری اجکل پاکستان آئے ہوئے نیں۔ اوہ کُجھ چِر توں بیمار سن جیہدی وجہ اوہناں دے سینے اُتے بنن والا پھوڑا سی۔ ایس پھوڑے دی وجہ توں اوہناں دی طبیعت خراب ہو گئی سی۔ جیہدے اُتے ڈاکٹراں ولوں اوہناں نوں آپریشن دا مشورہ دتا گیا۔ ڈاکٹراں دے مشورے مگروں اج اوہناں نوں ہسپتال منتقل کیتا گیا۔ جتھے اوہناں دا آپریشن کرنا پیا۔کامیاب آپریشن مگروں ہن اوہناں نوں وارڈ وچ منتقل کر دتا گیا اے۔