اسلام آباد(پاکستان پوائنٹ نیوز22۔اکتوبر۔2018ء) وزیر اعظم عمران خان دا اماراتی ولی عہد محمد شیخ بن زید نال رابطہ، متحدہ عرب امارات دے ولی عہد نوں دورہ پاکستان دی دعوت دتی گئی، جو اوہناں نے قبول کرلیا۔ تفصیل مطابق پاکستان تے متحدہ عرب امارات دے ولی عہد شیخ محمد بن زید نال وزیر اعظم عمران خان ولوں ٹیلی فونک رابطہ کیتا گیا اے۔ وزیر اعظم عمران خان نے سعودی عرب جان توں پہلاں اماراتی وی عہد شیخ محمد بن زید نال ٹیلی فونک رابطہ کیتا۔
ایس دوران وزیر اعظم عمران خان نے اماراتی ولی عہد شیخ محمد بن زید نوں پاکستان آن دی دعوت دتی۔ اماراتی ولی عہد نے وزیراعظم عمران خان ولوں دتی جان والی دورے دی دعوت قبول کر لی اے۔ ایس دوران دوناں رہنماواں وچکار اقتصادی تعاون ودھان بارے وی گل بات ہوئی۔ ایس موقعے تے اماراتی ولی عہد نے وزیر اعظم نوں تعاون دی یقین دہانی کروائی اے۔ یاد رہوے کہ اج وزیر اعظم عمران خان سعودی عرب دے دورے اُتے چلے گئے نیں۔
وزیر اعظم نال وفاقی وزیر شاہ محمود قریشی، اسد عمر تے فواد چودھری وی گئے ۔وزیر اعظم عمران خان ریاض وچ ہون والی ’مستقبل میں سرمایہ کاری دے مواقع‘ دے سرناویں ہیٹھ ہون والی کانفرنس وچ رلت کرن گے۔ ریاض وچ ہون والی کانفرنس نوں ’صحرا میں ڈیوس‘ دا ناں دتا گیا اے۔وزیر اعظم عمران خان نوں سعودی فرمانروا شاہ سلمان نے کانفرنس وچ رلت دی دعوت دتی اے۔ ریاض وچ ہون والی کانفرنس وچ دنیا بھر توں مشہور کاروباری بندے وی رلت کرن گے۔ عمران خان دورے دوران سعودی فرمانروا شاہ سلمان تے ولی عہد محمد بن سلمان نال ملاقات کرن گے۔
