اسلام آباد(پاکستان پوائنٹ نیوز22۔اکتوبر۔2018ء) سینئر تجزیہ کار و چیئرمین دن میڈیا گروپ محمود صادق نے آکھیا اے کہ وزیر اعظم نے اپوزیشن جماعتاں نوں چور ٹھگ قرار دے دتا، وزیر اعظم نے آکھیا کہ ساری اپوزیشن گرفتار ہوئے گی، ایہناں ساریاں کولوں جو پیسے لئے جان گے اوہ پیسے ملک نوں چلان لئی بہت ہون گے، 3مہینیاں وچ ملک نوں بحرانوں کڈھ دیواں گے۔
سینئر تجزیہ کار محمود صادق نے وزیر اعظم عمران خان نال پرچا کاراں تے میڈیا مالکان نال ملاقات مگروں گل بات کردے ہوئے دسیا کہ بڑی سادہ جیہی گل اے کہ میڈیا مالکان نوں سمجھ آنی چاہیدی کہ معیشت ترقی کرے گی تے میڈیا اپنے آپ اگانہ ودھے گا ، جے معیشت نوں دباء دتا جائے گا تے میڈیا اپنے آپ ختم ہو جائے گا۔ وزیر اعظم نال ملاقات دوران میڈیا مالکان نوں 20منٹ بولن دی اجازت ملی تے اوہناں نے اشتہاراں دی خیرات منگی تے وزیراعظم نوں دسیا اشتہار میڈیا لئی کیوں ضروری نیں۔
جیہدے اُتے وزیر اعظم عمران خان نے میڈیا مالکان نوں آکھیا کہ تُسیں اپنے میڈیا سٹاف نوں جو تنخاہواں دیندے او اوہناں نوں ریشنلائز کرو، یعنی تنخاہواں گھٹ کرو۔ مطلب اوہناں نے آکھیا کہ میڈیا اپنے خرچے گھٹ کرے۔ محمود صادق نے ہور دسیا کہ وزیر اعظم نے معیشت نوں بہتر کرن دا بڑا دلچسپ طریقہ دسیا۔ اوہناں نے آکھیا کہ سانوں 10,12ارب دا کسارا(خسارہ) اے تے ایہ صرف 2,3مہینے دا مسئلا اے ایہدے مگروں ملک نوں مسائل وچوں کڈھ لواں گے۔
