اسلام آباد(پاکستان پوائنٹ نیوز22۔اکتوبر۔2018ء) وزیر اعظم عمران خان سعودی عرب دے دورے اُتے چلے گئے، وزیر اعظم ریاض وچ ہون والی کانفرنس وچ رلت کرن گے، عمران خان دورے دوران سعودی فرمانروا شاہ سلمان تے ولی عہد محمد بن سلمان نال ملاقات کرن گے۔ میڈیا رپورٹس مطابق وزیر اعظم عمران خان سعودی عرب دے دورے اُتے چلے گئے نیں۔ وزیر اعظم نال وفاقی وزیر شاہ محمود قریشی، اسد عمر تے فواد چودھری وی گئے ۔
وزیر اعظم عمران خان ریاض وچ ہون والی ’مستقبل میں سرمایہ کاری دے مواقع‘ دے سرناویں ہیٹھ ہون والی کانفرنس وچ رلت کرن گے۔ ریاض وچ ہون والی کانفرنس نوں ’صحرا میں ڈیوس‘ دا ناں دتا گیا اے۔وزیر اعظم عمران خان نوں سعودی فرمانروا شاہ سلمان نے کانفرنس وچ رلت دی دعوت دتی اے۔ ریاض وچ ہون والی کانفرنس وچ دنیا بھر توں مشہور کاروباری بندے وی رلت کرن گے۔ عمران خان دورے دوران سعودی فرمانروا شاہ سلمان تے ولی عہد محمد بن سلمان نال ملاقات کرن گے۔
