اسلام آباد(پاکستان پوائنٹ نیوز22۔اکتوبر۔2018ء) نجی ٹی وی چینل دے پروگرام وچ گل بات کردے ہوئے پاکستان تحریک انصاف دے رہنما و صوبائی وزیر علیم خان نے آکھیا کہ اسیں جِنے دن وزیر اعلا پنجاب عثمان بزدار نال کم کیتا، مینوں اندازہ ہوگیا کہ عثمان بزدار سبھ نوں نال لے کے چلن والے انسان نیں۔ اوہناں اندر ایہ صلاحیت موجود اے تے ایہ بہت سوہنی خوبی اے۔
اوہناں دا آکھنا سی کہ ہر پارٹی اندر گروپس ہوندے نیں ، ساڈی پارٹی وچ وی گروپس نیں۔ انج دے گروپس نوں نال لے کے چلنا اودوں تیکر آسان ہوندا اے جدوں تیکر تُسیں آپ نیوٹرل او۔ غیر جانبدار او۔علیم خان دا کہنا سی کہ جے تُسیں آپ نیوٹرل نہیں تے سبھ نوں نال لے کے چلنا مشکل ہو جاندا اے۔ کیونکہ فیر تہاڈی اپنی پسند یاں ناپسند وی وچ آ جاندی اے۔ اوہناں دا آکھنا سی کہ سانوں پارٹی وچ 8,9سال ہوگئے نیں۔
ساڈے وی پارٹی وچ کُجھ قریبی، کُجھ بہت قریبی لوک سن، کُجھ اینے قریبی نہیں نیں۔ عثمان بزدار کیونکہ نویں پاکستان تحریک انصاف وچ آئے سن ایس لئی پارٹی اندر موجود گروپس نال عثمان بزدار دی اوس درجے دی وابستگی نہیں سی۔ اوہناں دا کسے نال کوئی تعلق نہیں سی۔ کسے گروپ نال کوئی وابستگی نہیں سی۔ اک سوال دے جواب وچ اوہناں دا آکھنا سی کہ میرا گروپ جہانگیر ترین والا یاں شاہ محمود قریشی والا نہیں ، میرا گروپ عمران خان والا اے۔
