اسلام آباد(پاکستان پوائنٹ نیوز22۔اکتوبر۔2018ء) اج احتساب عدالت وچ دو سابق وزیر اعظماں دی ملاقات ہوئی۔ میڈیا رپورٹس وچ دسیا گیا اے کہ کرپشن دے الزام وچ نیب مقدمیاں دا ساہمنا کرن والے دو سابق وزیر اعظم نواز شریف تے یوسف رضا گیلانی دی احتساب عدالت وچ ملاقات ہوئی۔ دوناں وچکار دلچسپ جملیاں دا وی وچار وٹاندرا ہویا۔ سابق وزیر اعظماں نے اک دوجے نال چنگے ماحول وچ گل بات کیتی ۔
دوناں نے اک دوجے دا حال پُچھیا ۔ عدالت وچ پہلے یوسف رضا گیلانی نوں روسٹرم اُتے سدیا گیا۔نیب پراسیکیوٹر عدالت وچ پیش نہ ہوئے۔ یوسف رضا گیلانی نے آکھیا کہ تُسیں پہلے میاں صاحب دا کیس سُن لوو میں انتظار کر لینا واں تے جج نے جواب دتا کہ میاں صاحب دے کیس وچ پورا دن لگے گا۔ نواز شریف نال ملاقات دے موقعے اُتے یوسف رضا گیلانی نے آکھیا کہ چار وزیر اعظم تے عدالتاں وچ پیش ہوگئے، ہن 5واں وی آئے گا۔
یوسف رضا گیلانی دی گل اُتے نواز شریف ہسدے رہے۔ یوسف رضا گیلانی نے آکھیا کہ ہن وی وزیر اعظم پیش ہون گے، اسیں کئی سال توں نیب کورٹ آ رہے آں، نیب دا ادارہ بااختیار تے آزاد ہونا چاہیدا۔ وزیر اعظم نوں نہیں آکھنا چاہیدا کہ فلاں نوں پھڑاں گا، احتساب ہونا چاہید ا پر احتساب دا ادارہ آزاد ہونا چاہیدا۔ اوہناں نے آکھیا کہ10سال میں جیل مینول دے مطابق جیل کٹی، فیصلے میرے حق وچ ہوئے تے میرے 10ورھیاں دا جواب کون دیوے گا۔ مینوں باعزت بری کیتا گیا تے میں وزیر اعظم بن گیا۔
