اسلام آباد(پاکستان پوائنٹ نیوز20۔اکتوبر۔2018ء) وزیر اعظم عمران خان نے آکھیا اے کہ سیاستداناں دی اکثریت مجرماں دی اے،موجودہ اپوزیشن حقیقی اپوزیشن نہیں، ایہ سارے اپنیاں جائیداداں بچان لئی اکٹھے ہوئے نیں،میں دس دینا چاہنا واں کہ ایہناں نوں نہیں چھڈاں گا، کسے دے دباء وچ نہیں آواں گا، اینے ثبوت نیں کہ مجرم بچ نہیں سکدے۔ اوہناں نے اج سینئر پرچا کاراں نال گل بات کردے ہوئے آکھیا کہ آئی ایم ایف کول جانا مسئلا نہیں ا ے بلکہ آئی ایم ایف دیاں شرطاں مسئلا نیں۔
اوہناں نے آکھیا کہ لوکائی اُتے پہلے ای بہت بھار پا چُکے آں ۔ لوکائی اُتے ہور مہنگائی دا بھار نہیں پانا چاہندے۔ اسیں چاہندے آں لوکائی اُتے مہنگائی دا گھٹو گھٹ بھار پایاجائے۔ اوہناں نے آکھیا کہ سیاستداناں دی اکثریت مجرماں دی اے۔ شہباز شریف نیلسن منڈیلا بنن دی کوشش کر رہے سن۔ عمران خان نے آکھیا کہ موجودہ اپوزیشن حقیقی اپوزیشن نہیں اے۔ موجودہ اپوزیشن اپنیاں جائیداداں بچان لئی اکٹھی ہوئی اے۔ایہ صرف چوری دا مال بچان لئی اکٹھے ہوئے نیں۔ وزیر اعظم عمران خان نے آکھیا کہ میں زندگی وچ اک ای کم کیتا اے کہ کدی دباء قبول نہیں کیتا۔ میں دسنا چاہنا واں کہ میں اوہناں نوں نہیں چھڈاں گا۔ کسے دے دباء وچ نہیں آواں گا۔ ساڈے کول اینے ثبوت موجود نیں کہ مجرم بچ نہیں سکدے۔
