احتساب عدالت دے فیصلے اُتے عملدرآمد،اسحاق ڈار کولوں سبھ کُجھ کھوہ لیا گیا

احتساب عدالت دے فیصلے اُتے عملدرآمد،اسحاق ڈار کولوں سبھ کُجھ کھوہ لیا گیا

لاہور(پاکستان پوائنٹ نیوز20۔اکتوبر۔2018ء) سابق وزیر خزانہ اسحاق ڈار خلاف احتساب عدالت دے فیصلے اُتے عملدرآمد شروع کر دتا گیا ۔ نجی ٹی وی مطابق کراچی تے لاہور دے چار بنکاں دے اکاؤنٹس وچ پئے کروڑاں رُپئے صوبائی حکومت دے ناں منتقل کرن دی تیاری شروع کر دتی گئی اے۔ دسیا گیا اے کہ لیٹرز چاراں بنکاں دے چیف ایگزیکٹو افسراں نوں جاری کیتے گئے نیں۔

ریونیو ڈیپارٹمنٹ نے ایل ڈی اے راہیں گلبرگ تھری ایچ 7اُتے موجود اسحاق ڈار دے گھر نوں حکومت پنجاب دے ناں منتقل کروالیا اے۔ حکومت پنجاب ولوں ڈپٹی کمشنر لاہور کیپٹن(ر) انوار الحق نے پراپرٹیز تے اکاؤنٹس دی ملکیت لین لئی لیٹرز جاری کرائے۔ یاد رہوے کہ 27ستمبر نوں نیب نے اسلام آباد ہائی کورٹ وچ دائر کیتی گئی درخاست وچ بینتی کیتی سی کہ (ن) لیگی رہنما و سابق وزیر خزانہ اسحاق ڈار دی ساری جائیداد ویچن دی اجازت دتی جائے۔

نیب ولوں درخاست سپیشل پراسیکیوٹر عمران شفیق ولوں دائر کیتی گئی سی۔ سپیشل پراسیکیوٹر عمران شفیق دی درخاست دے متن وچ آکھیا گیا سی کہ اسحاق ڈارنوں نیب تے عدالت اشتہاری قرار دے چکے نیں۔ اسحاق ڈار بیماری دا بہانہ بنا کے برطانیہ وچ نیں۔ اوہناں نوں باہر طلبی دے نوٹس وی جاری کیتے گئے پر اوہناں نے کوئی جواب نہیں دتا۔ ایس لئی اوہناں دی جائیداد ویچن دی اجازت دتی جائے۔