اسلام آباد(پاکستان پوائنٹ نیوز20۔اکتوبر۔2018ء) پاکستان میڈیا ریگولیٹری اتھارٹی( پیمرا) نے مسلم لیگ (ن) دے سابق سینیٹر نہال ہاشمی دی ریاستی اداریاں خلاف جھیڑوی(متنازعہ) تقریر دا نوٹس لیند ے ہوئے جھیڑوی تقریر چلان اُتے ٹی وی چینلز کولوں جواب منگ لیا۔ ہفتے نوں جاری بیان مطابق پیمرا نے ٹی وی چینلز کولوں پُچھیا کہ نہال ہاشمی دی ریاستی اداریاں خلاف تقریر کیوں چلائی گئی، چینلز دسن تقریر چلان اُتے کیوں نہ اوہناں خلاف کارروائی کیتی جائے۔
ترجمان نے آکھیا کہ غیر تسلی بخش جواب اُتے ٹی وی چینلز دیاں نشریات معطل یاں جرمانہ کیتا جا سکدا اے۔یاد رہوے کہ پچھلے دیہاڑے نہال ہاشمی نے کراچی وچ اک تقریب نال خطاب کردے ہوئے آکھیا کہ حکومت اُتے کوئی ہور قبضہ کیتی بیٹھا اے۔ تہاڈے وسائل نال کوئی ہور عیش کر رہیا اے۔ اج ملک وچ دو طرحاں دے لوکاں وچکار جنگ جاری اے۔ اک تے قائداعظم دے اوہ پُتر نیں جو ملک نوں اگانہہ لیجانا چاہندے نیں تے اک اوہ جو اپنیاں گلاں، حکماں تے ہتھیاراں نال پاکستان دے لوکاں دے سینے چھلنی کرنا چاہندے نیں۔
نہال ہاشمی نے ہور آکھیا کہ ساڈے ملک دی 8لکھ فوج نے اک انچ زمین حاصل نہیں کیتی۔ ایہ صرف وکھان دا ایٹم بم نیں۔ صرف وکھان لئی ایف 16رکھیا ہویا اے ایہنوں استعمال نہیں کر سکدے۔ نہال ہاشمی نے آکھیا کہ اسلحہ وی صرف وکھان لئی رکھیا ہویا اے۔ یاد رہوے کہ ایس توں پہلاں نہال ہاشمی توہین عدالت دے جرم وچ اک مہینے لئی جیل دی ہوا کھا چکے نیں۔
