کراچی(پاکستان پوائنٹ نیوز19۔اکتوبر۔2018ء) سندھ ہائی کورٹ نے نجی چینل تے اوہدے اینکر نوں بحریہ ٹاؤن دے چیف ایگزیکٹو افسر ملک ریاض خلاف من گھڑت گلاں کرن تے بحریہ ٹاؤن بارے غلط بیان دین توں روکدے ہوئے 8نومبر نوں سدیا اے۔ میڈیا رپورٹس وچ دسیا گیا اے کہ بحریہ ٹاؤن دے سی ای او نے نجی چینل تے اوہدے اینکر محمد مالک خلاف سندھ ہائی کورٹ وچ اک درخاست دائر کیتی سی۔
درخاست وچ آکھیا گیا کہ نجی ٹی وی چینل دے پروگرام وچ اینکر نے اوہناں خلاف بہت ساریاں شیواں منسوب کیتیاں جوکہ بالکل غلط سن۔ درخاست اُتے سنوائی کردے ہوئے سندھ ہائی کورٹ دے جسٹس جنید غفار نے نجی چینل تے اوہدے اینکر نوں مدعیاں خلاف کسے وی قسم دے غلط بیان دین توں روک دتا۔ بحریہ ٹاؤن دے وکیل نے آکھیا کہ آزادی رائے دا اظہار سبھ دا ہوندا اے تے ایہ ہر کسے دا بنیادی حق اے پر سبھ نوں قانون دے تابع ہونا چاہیدا۔
ہر کوئی منصفانہ طریقے نال اپنے نظریات دا اظہار کرن لئی آزاد اے پر بغیر ثبوت دے کسے وی بندے نوں بدنام کرنا جائز نہیں۔ جیہدے مگروں عدالت نے نجی ٹی وی چینل تے اینکر محمد مالک نوں 8نومبر نوں طلب کردے ہوئے ملک ریاض تے بحریہ ٹاؤن خلاف بیان دین توں روک دتا اے۔ایس بارے ٹویٹ کردے ہوئے محمد مالک دا آکھنا سی کہ ملک ریاض بارے سچ بولن اُتے مینوں سندھ ہائی کورٹ نے نوٹس جاری کیتااے ۔مینوں ایہ جان کے خشی ہوئی اے کہ میری وجہ توں اوہناں دیاں راتاں دیاں نیندراں اُڈ گئیاں۔اوہناں دا آکھنا سی کہ مینوں پیسیاں نال خریدنا ممکن نہیں اے۔ ملک ریاض ورگے لوکاں ساہمنے کھڑا ہون لئی کسے وکیل دی نہیں بلکہ جرات تے سا لمیت دی لوڑ ہوندی اے تے الحمد اللہ میرے وچ دوویں صفتاں نیں۔
