لاہور(پاکستان پوائنٹ نیوز19۔اکتوبر۔2018ء) پاکستان مسلم لیگ (ن) دے مرکزی رہنما رانا ثنااللہ نے نہال ہاشمی دے اداریاں خلاف بیان دی مخالفت کیتی اے۔ اوہناں نے آکھیا کہ نہال ہاشمی مسلم لیگ (ن) دا حصہ نہیں نیں۔ نہال ہاشمی نوں اداریاں خلاف ایس طرحاں دا بیان نہیں دینا چاہیدا سی۔ میڈیا رپورٹس مطابق سابق صوبائی وزیر قانون و رکن قومی اسمبلی رانا ثنااللہ نے سابق سینیٹر نہال ہاشمی دے اداریاں خلا ف بیان اُتے اپنے ردعمل وچ آکھیا کہ نہال ہاشمی نوں فوج یاں ملکی اداریاں خلاف بیان بازی نہیں کرنی چاہیدی۔
اوہناں نے آکھیا کہ نہال ہاشمی مسلم(ن) دا حصہ نہیں نیں۔یاد رہوے کہ اج نہال ہاشمی نے کراچی وچ اک تقریب نال خطاب کردے ہوئے آکھیا کہ حکومت اُتے کوئی ہور قبضہ کیتی بیٹھا اے۔ تہاڈے وسائل نال کوئی ہور عیش کر رہیا اے۔ اج ملک وچ دو طرحاں دے لوکاں وچکار جنگ جاری اے۔ اک تے قائداعظم دے اوہ پُتر نیں جو ملک نوں اگانہہ لیجانا چاہندے نیں تے اک اوہ جو اپنیاں گلاں، حکماں تے ہتھیاراں نال پاکستان دے لوکاں دے سینے چھلنی کرنا چاہندے نیں۔
نہال ہاشمی نے ہور آکھیا کہ ساڈے ملک دی 8لکھ فوج نے اک انچ زمین حاصل نہیں کیتی۔ ایہ صرف وکھان دا ایٹم بم نیں۔ صرف وکھان لئی ایف 16رکھیا ہویا اے ایہنوں استعمال نہیں کر سکدے۔ نہال ہاشمی نے آکھیا کہ اسلحہ وی صرف وکھان لئی رکھیا ہویا اے۔ یاد رہوے کہ ایس توں پہلاں نہال ہاشمی توہین عدالت دے جرم وچ اک مہینے لئی جیل دی ہوا کھا چکے نیں۔
