لاہور(پاکستان پوائنٹ نیوز19۔اکتوبر۔2018ء) تعلیم اج دے دورے وچ اک اہم ضرورت بن گئی اے، بال غریب ہوئے یاں امیر تعلیم حاصل کرن لئی گھروں باہر وی رہنا پئے تے رہندا اے۔دوجے علاقیاں توں کئی پڑھیاروڈے شہراں ول آؤندے نیں تے بہتر تعلیمی اداریاں وچ داخلا لے کے ہاسٹل وچ رہندے نیں پر ہاسٹل دے وی اپنے ای رنگ نیں۔ ہاسٹل وچ رہن والے پڑھیاراں دی ایس گل دا اندازہ ایتھوں لایا جا سکدا اے کہ جے تُسیں کوئی شے گوا لئی تے فیر اوہنوں لبھن وچ ویلا لان دی بجائے نویں خرید لینی چاہیدی کیونکہ جو شے ہتھوں نکل گئی اوہدا واپس آنا مشکل اے۔
سوشل میڈیا اُتے اک طالبہ دے نوٹس دی تصویر وائرل ہو رہی اے جیہنوں ورتیندڑاں(صارفین) ولوں بہت پسند کیتا جا رہیا اے۔ سوشل میڈیا اُتے وائرل ہوئی تصویر وچ اک طالبہ نے اپنا ’فیس واش‘ چوری کرن والے نوں اجیہے دلچسپ انداز وچ وارننگ دتی کہ پڑھن والا حیران ہوئے بغیر نہ رہ سکیا۔ ایس نوٹس وچ لکھیا گیا کہ میرا فیس واش کسے نے کولر اُتے پئے مگ وچوں چوری کیتا اے۔ میں فیس واش چوری کرن والی کُڑی نوں خبردار کرنی آں کہ میرا فیس واش واپس اوسے تھاں رکھ دیوے نہیں تے میں اوہدے خلاف وظیفہ شروع کر لواں گی جیہدے نتیجے وچ ظاہر ہون والے اثرات دی ذمے وارہ اوہ آپے ہوئے گی۔ سوشل میڈیا ورتیندڑ جتھے ایس نوٹس اُتے ہسے، اوتھے اوہ وظیفہ پڑھن والی گل اُتے حیران وی نیں۔
