اسلام آباد(پاکستان پوائنٹ نیوز18۔اکتوبر۔2018ء) آئی ایم ایف توں قرضہ نہ لین دی آس ودھ گئی، وزیر اعظم دے دورہ چین دوران چینی حکومت ولوں وڈی مالی مدد دی آس،ہور دوست ملکاں نال وی معاملات طے کیتے جا رہے نیں۔ تفصیل مطابق آس پیدا ہوئی اے کہ پاکستان نوں زرمبادلا دے ذخائر نوں سنبھالا دین لئی آئی ایم ایف کولوں شاید نہ جانا پئے۔ ایس حوالے نال وسیلیاں نے دسیا اے کہ وزیر اعظم دے دورہ چین دوران چینی حکومت ولوں وڈی مالی مدد ملن دی آس اے ۔
ایس توں وکھ حکومت ہور دوست ملکاں نال وی معاملات طے کرن دی کوشش کررہی اے۔ وزیراعظم عمران خان اگلے مہینے دی 3تاریخ نوں چین دا اہم ترین دورہ کرن گے۔ وزیر اعظم بنن مگروں عمران خان دا ایہ پہلا دورہ چین ہوئے گا۔ ایس دوران سی پیک منصوبے سنے ہور اہم اقتصادی و سٹرٹیجک معاملات بارے غور کیتا جائے گا۔وسیلیاں دا آکھنا اے کہ حکومت کوشش کر رہی اے کہ اوہنوں چین ولوں نرم شرطاں اُتے قرضہ مل جائے۔
چین ولوں قرضہ ملن دی صورت وچ حکومت نوں آئی ایم ایف کولوں قرضہ لین دی لوڑ نہیں پئے گی۔ وسیلیاں دا ہور آکھنا اے کہ چین نے وی ایس حوالے نال گرین سگنل دتا اے جدکہ آئی ایم ایف کولوں قرضہ لین دے معاملے اُُتے امریکا ولوں وی مخالفت کیتے جان مگروں ایس معاملے اُتے چین پاکستان دی مدد لئی میدان وچ آ سکدا اے۔
