لاہور(پاکستان پوائنٹ نیوز18۔اکتوبر۔2018ء) محکمہ سیاحت پنجاب نے ڈبل ڈیکر بس دے کرایاں وچ وادھا کر دتا، کرایاں وچ 50توں 100رُپئے وادھا کیتا گیا اے، نویں کرایاں دا اطلاق آؤندے مہینے توں ہوئے گا، پر ذہنی معذور تے وڈی عمر دے شہریاں لئی سفر مفت ہوئے گا۔ میڈیا رپورٹس مطابق پنجاب حکومت نے میٹرو بس اُتے سبسڈی ختم کرن مگروں ڈبل ڈیکر بساں دے کرایاں وچ وادھا کر دتا اے۔
محکمہ سیاحت پنجاب مطابق نویں کرائے آؤندے مہینے وصول کیتے جان گے۔ کرایاں وچ 50توں 100رُپئے ودھایا گیا اے۔ قذافی سٹیڈیم توں گریٹر پارک تیکر بس دا کرایہ فی سواری 300رُپئے لیا جائے گا جدکہ واہگہ بارڈر تیکر کرایہ 300توں 400رُپئے کر دتا گیا اے۔ پڑھیاراں لئی نواں کرایہ 150توں 200رُپئے اے ، پر ڈبل ڈیکر بساں وچ ڈہنی معذور تے وڈی عمر دے شہراں لئی سفر دیاں سہولتاں مفت ہون گیاں۔
دوجے پاسے پنجاب حکومت نے میٹرو بساں اُتے سبسڈی ختم کرن دا فیصلاکرلیا اے۔ ہن شاہدرہ توں گجومتہ تیکر چلن والی میٹرو بس دا کرایہ سٹاپ ٹو سٹاپ ہوئے گا۔ وزیر خزانہ پنجاب مخدوم ہاشم بخت نے اپنے بیان وچ آکھیا اے کہ پنجاب وچ میٹرو بساں دے کرائے اُتے سبسڈی ختم کرن دا فیصلا کر لیا اے۔ اوہناں دا آکھنا سی کہ ملتان تے راولپنڈی دی میٹرو اُتے سالہوار12ارب رُپئے دی سبسڈی دتی جا رہی اے۔
شاہدرے توں گجومتہ تیکر چلن والی میڑو دا کرایہ سٹاپ ٹو سٹاپ کرن دا فیصلا کیتا اے۔ اوہناں دا آکھنا سی کہ میٹرو بساں دے کرائے ریشنلائز کرن نال حکومتی سبسڈی وچ وی کمی آئے گی۔ کرائے ریشنلائز کرن نال لوکائی اُتے بھار نہیں پئے گا۔ بجٹ وچ نِکیاں امپورٹڈ گڈیاں د ی رجسٹریش فیس وچ کمی تے وڈیاں گڈیاں دی فیس ودھا دتی اے۔ وزیر خزانہ نے ہور آکھیا کہ مفت علاج لئی ہیلتھ انشورنس کارڈ دتے جان گے۔ کساناں نوں آسان شرطاں اُتے قرضے دتے جان گے۔
