الیکشن کمیشن نے شاہد خاقان عباسی دی کامیابی دا نوٹی فکیشن روک دتا

سابق وزیر اعظم ولوں اثاثیاں دیاں تفصیلاں جمع نہ کروان اُتے نوٹی فکیشن روکیا گیا

الیکشن کمیشن نے شاہد خاقان عباسی دی کامیابی دا نوٹی فکیشن روک دتا
سابق وزیر اعظم ولوں اثاثیاں دیاں تفصیلاں جمع نہ کروان اُتے نوٹی فکیشن روکیا گیا

لاہور(پاکستان پوائنٹ نیوز18۔اکتوبر۔2018ء) الیکشن کمیشن نے شاہد خاقان عباسی دی کامیابی دا نوٹی فکیشن روک دتا۔سابق وزیر اعظم ولوں اثاثیاں دیاں تفصیلاں جمع نہ کروان اُتے نوٹی فکیشن روکیا گیا۔تفصیل مطابق 14اکتوبر نوں قومی اسمبلی دیاں 11وچوں مسلم لیگ (ن) تے تحریک انصاف نے چار چار جدکہ مسلم لیگ(ق) نے دو تے متحدہ مجلس نے اک سیٹ اُتے کامیابی حاصل کیتی سی۔

ایس موقعے تے قومی اسمبلی دے حلقہ این اے 124توں ودھیرے ووٹ لے کے مسلم لیگ (ن) دے امیدوار شاہد خاقان عباسی کامیاب ہوئے۔ پر ہن الیکشن کمیشن نے سابق وزیر اعظم شاہد خاقان عباسی دی کامیابی دا نوٹی فکیشن روک دتا اے۔ الیکشن کمیشن نے سابق وزیر اعظم ولوں اثاثیاں دیاں تفصیلاں جمع نہ کروان اُتے نوٹی فکیشن روکیا۔ یاد رہوے کہ ایس توں پہلاں اج خبر ساہمنے آئی سی کہ این اے 65توں مسلم لیگ (ق) دے جِتن والے امیدوار چودھری سالک حسین دی جِت اُتے سوالیہ نشان لگ گیا، این اے 65دے تن پولنگ سٹیشناں اُتے نہ زنانیاں(خواتین) ایجنٹ سن تے نہ ای زنانیاں نے ووٹ پایا۔

میڈیا رپورٹس مطابق ڈسٹرکٹ ریٹرننگ افسر نے مڈھلی تحقیقاتی رپورٹ چیف الیکشن کمیشن نوں گھل دتی اے۔ رپورٹ وچ دسیا گیا اے کہ این اے 65چکوال دے 3پولنگ سٹیشناں اُتے سوانیاں نے ووٹ نہیں پایا۔ انتخابی عمل بارے تحقیقاتی رپورٹ وچ ہور دسیا گیا اے کہ این اے 65دے تن پولنگ سٹیشناں اُتے پولنگ ایجنٹس سن نہ سوانیاں نے ووٹ پایا۔ پر الیکشن کمیشن دے وسیلیاں دا آکھنا اے کہ این اے 65چکوال وچ فیر الیکشن ہوئے گا یاں نہیں فیصلا الیکشن کمیشن کرے گا۔

یاد رہوے کہ ضمنی الیکشن 2018وچ این اے 65چکوال توں مسلم لیگ (ق) دے امیدوار و سابق وزیر اعظم چودھری شجاعت دے پُتر چودھری سالک نے کامیابی حاصل کیتی سی۔ چودھری سالک حسین نے 1لکھ917ووٹ لئے سن جدکہ اوہناں دے مقابلے وچ تحریک لبیک دے محمد یعقوب 32326لے کے دوجے نمبر اُتے رہے۔