لاہور(پاکستان پوائنٹ نیوز18۔اکتوبر۔2018ء) شہباز شریف تے خواجا آصف دی پرانی دشمنی ساہمنے آ گئی۔ تفصیل مطابق مشہور پرچا کار رؤف کلاسرا نے شہباز شریف دے خواجا آصف بارے وعدہ معاف گواہ بنن دے بیان پچھے لُکیا اہم راز بیان کر دتا۔ مشہور پرچا کار دا آکھنا سی کہ شہباز شریف نے کل قومی اسمبلی وچ خواجا آصف دا ناں لیا پر میں اندر دی کہانی دسنا واں۔
اصل گل ایہ اے کہ جدوں خواجا آصف پاور منسٹر سن تے شہباز شریف وزیر اعلاتے خواجا آصف دی وزارت شہباز شریف تے اوہناں دے پُتر حمزہ شہباز چلا رہے سن۔ کیبنٹ وچ ایہناں دوناں دی چنگی گرما گرمی ہوگئی سی۔ جیہدے مگروں خواجا آصف نے شہباز شریف دی شکایت نواز شریف نوں کیتی تے نوازشریف نے آکھیا کہ مینوں ایہناں وزارتاں دا کیہ پتا ایہ تے شہباز شریف ویکھدے نیں۔
خواجا آصف نے آکھیا کہ میں ایہ وزارت نہیں چلا سکدا کیونکہ تہاڈے بھرا تے بھتیجے ساریاں ڈیلاں کر رہے نیں۔رؤف کلاسردا آکھنا سی کہ ایہدے مگروں فیر نندی پور دا مسئلا ہویا۔ نندی پور بارے نیب تحقیقات کر رہیا اے تے نندی پور دی ڈیل شہباز شریف نے کیتی سی۔ شہباز شریف 22ارب رُپئے نال ہون والی ڈیل100ارب توں اُتے لے گئے۔ اصل وچ شہباز شریف نندی پور دی مینٹینس دا کنٹریکٹ ملائیشیا دی اک کمپنی نوں دینا چاہندے سن پر خواجا آصف چین دی کمپنی نوں ۔
جدوں نیب نے نندی پور دیاں تحقیقات کیتیاں تے شہباز شریف کولوں چینی کمپنی دا کنٹریکٹ دین مگروں اوہدے وچ ہوئیاں بے ضابطگیاں بارے پُچھیا گیا تے شہباز شریف نے نیب نوں دسیا ایہ کنٹریکٹ تے خواجا آصف نے دتا سی۔ ایس پوائنٹ اُتے نیب نے شہباز شریف نوں آکھیا کہ تُسیں ایہ گل خواجا آصف اُتے پا رہے او تے کیہ تُسیں ایہدی گواہی دیو گے تے ایہ گل سی جو شہباز شریف کدی وی خواجا آصف نوں نہیں دسن گے پر ایہ ساری کہانی سی جیہدی وجہ توں شہباز شریف نے آکھیا سی کہ نیب نے مینوں خواجا آصف خلاف وعدہ معاف گواہ بنن لئی آکھیا ۔
