لاہور(پاکستان پوائنٹ نیوز18۔اکتوبر۔2018ء) پنجاب حکومت نے میٹرو بساں اُتے سبسڈی ختم کرن دا فیصلاکرلیا، ہن شاہدرہ توں گجومتہ تیکر چلن والی میٹرو بس دا کرایہ سٹاپ ٹو سٹاپ ہوئے گا۔ وزیر خزانہ پنجاب مخدوم ہاشم بخت نے اپنے بیان وچ آکھیا اے کہ پنجاب وچ میٹرو بساں دے کرائے اُتے سبسڈی ختم کرن دا فیصلا کر لیا اے۔ اوہناں دا آکھنا سی کہ ملتان تے راولپنڈی دی میٹرو اُتے سالہوار12ارب رُپئے دی سبسڈی دتی جا رہی اے۔
شاہدرے توں گجومتہ تیکر چلن والی میڑو دا کرایہ سٹاپ ٹو سٹاپ کرن دا فیصلا کیتا اے۔ اوہناں دا آکھنا سی کہ میٹرو بساں دے کرائے ریشنلائز کرن نال حکومتی سبسڈی وچ وی کمی آئے گی۔ کرائے ریشنلائز کرن نال لوکائی اُتے بھار نہیں پئے گا۔ بجٹ وچ نِکیاں امپورٹڈ گڈیاں د ی رجسٹریش فیس وچ کمی تے وڈیاں گڈیاں دی فیس ودھا دتی اے۔ وزیر خزانہ نے ہور آکھیا کہ مفت علاج لئی ہیلتھ انشورنس کارڈ دتے جان گے۔
کساناں نوں آسان شرطاں اُتے قرضے دتے جان گے۔ یاد رہوے کہ 16اکتوبر نوں پنجاب اسمبلی وچ سپیکر پرویز الہی دی صدارت ہیٹھ ہون والے اجلاس دوران وزیر خزانہ پنجاب مخدوم ہاشم نے بجٹ پیش کیتا۔ اوہناں دا آکھنا سی کہ اورنج لائن ٹرین منصوبے دی اُساری 250ارب تیکر اپڑ گئی اے۔ اورنج لائن ٹرین منصوبہ شہباز شریف حکومت دے حلق دا کنڈا بن گیا اے۔ اوہناں نے آکھیا کہ پچھلی حکومت نے اورنج لائن ٹریناں بنائیاں، اسیں بجٹ وچ خوراک، تعلیم تے صحت نوں ترجیح دتی اے۔
بجٹ وچ ترقیاتی بجٹ گھٹ کر دتا اے۔ صحت دیاں سہولتاں دین دی بجائے میٹر و ٹرین اُتے پیسا لایا گیا۔ موجودہ حکومت نے صحت لئی 284ارب رُپئے رکھے نیں۔ اوہناں نے آکھیا کہ سابق حکومت دی ترقی صرف اشتہاراں تیکر محدود سی۔ پچھلی حکومت دی ناقص حکمت عملی دی وجہ توں وڈا نقصان ہویا۔ پچھلی حکومت نے قرضے لین توں وکھ کوئی آپشن نہیں چھڈیا۔ اوہناں نے آکھیا کہ مضبوط تے جامع بلدیاتی نظام اُتے یقین رکھدے نیں۔
اوہناں نے آکھیا کہ تحریک انصاف دا 100دناں دا پلان عوام دوست اے۔ وزیر خزانہ پنجاب مخدوم ہاشم بخت نے آکھیا کہ حکومت کساناں لئی جامع پیکج پیش کرے گی۔ ون ونڈو آپریشن دے تحت ٹریٹمنٹ پلانٹ لائے جان گے۔ زرعی شعبے لئی 93ارب رکھے گئے نیں۔ مزدوراں لئی وی ٹھوس اقدامات کر رہے آں۔ بجٹ دیاں کاپیاں کتابی شکل دی بجائے یو ایس بی وچ دتیاں گئیاں نیں۔ ایس وار بجٹ وچ نویں پاکستان دی بنیاد رکھی جائے گی۔
پنجاب دا بجٹ نویں پاکستان دی راہ پدھر کرے گا۔ محصولات دے نظام وچ تبدیلی لیاواں گے۔ صاحب حیثیت بندیاں نوں ٹیکس دے دھارے وچ لیاواں گے۔ اوہناں نے آکھیا کہ تعلیم دے شعبے لئی 373ارب رُپئے رکھے گئے نیں۔ جو کہ پچھلے مالی سال دے بجٹ توں 28ارب توں ودھ نیں۔ معاشی بحران مگروں تعلیم نوں ترجیح دتی اے۔ ملک وچ ایس ویلے 90لکھ بال سکول نہیں جاندے۔ تنخاہواں دی مد وچ 313ارب تے پنشن لئی 207ارب رُپئے رکھے گئے نیں۔ ایسے طرحاں سالہوار ترقیاتی خرچیاں نوں گھٹا کے 238ارب کیتا گیا اے۔
