لاہور(پاکستان پوائنٹ نیوز17۔اکتوبر۔2018ء) پھانسی لگن ویلے مجرم عمران علی دے چہرے اُتے کوئی شرمندگی نہیں سی۔ تفصیل مطابق زینب سنے 8بالاں دے قاتل عمران علی نوں اج پھانسی دے دتی گئی اے۔ میڈیا نال گل بات کردے ہوئے زینب دے والد محمد امین دا آکھنا سی کہ عمران علی نوں پھانسی نشان عبرت اے۔ اوہناں دا ہور آکھنا سی کہ عمران علی آپ ٹُر کے پھانسی گھاٹ تیکر آیا پر اوہدے چہرے اُتے بالکل خوف یاں شرمندگی نہیں سی تے اوہ بغیر خوف ٹُر رہیا سی جو ویکھ کے میں ہور پریشان ہویا کہ ایہ کیسا بندہ اے جیہنوں موت توں وی خوف نہیں آ رہیا۔
عمران علی دی لاش ادھا گھنٹہ لٹکدی رہی۔ زینب دے والد دا آکھنا سی کہ مینوں اج انصاف مل گیا اے تے اسیں پارلیمنٹ وچ وی زور دیواں گے کہ اوہ ایس بارے بنائے گئے قانون نوں پاس کردے ہوئے ایہدے اُتے سختی نال عمل کروان تے بالاں نال ایہ جرم کرن والے کسے مجرم نوں بچنا نہیں چاہیدا تے اوہناں نوں سرعام پھانسی دتی جانی چاہیدی تاں جے ایس طرحاں دے جرماں نوں اوس ویلے روکیا جائے۔
جدکہ زینب دی ماں دا آکھنا سی کہ مجرم نوں سزا تے مل گئی پر ساڈی منگ سی کہ اوہنوں سرعام پھانسی دتی جائے۔ اوہناں نے آکھیا کہ عمران علی نے جیہڑے بالاں نوں پہلے قتل کیتا اودوں آواز چُکی جاندی تے اج شاید میری زینب زندہ ہوندی۔ پر ہن اوہ مطمئن نیں۔ اج زینب سنے اوہناں سارے بالاں نوں انصاف مل گیا جیہناں نال ایہ ظلم ہویا اے تے زینب دی وجہ توں باقی بالڑیاں نوں انصاف ملیا۔
دوجے پاسے عمران علی دی وصیت وی ساہمنے آگئی اے۔ اپنی وصیت وچ اوہنے لکھیا کہ رب کولوں اپنے کیتے دی معافی منگنا واں۔ میرے کیتے دی سزا مینوں مل گی اے۔ میں جو کیتا بہت غلط کیتا۔ میں اپنے کیتے اُتے بہت شرمندہ آں۔ زندگی وچ کوئی وی اجیہا کم نہ کرنا جیہدے نال شرمندگی ہوئے۔ عمران علی نے ایہ وی لکھیا کہ میرے گھر والیاں نوں تنگ نہ کیتا جائے ، اوہناں نوں اوہناں دے ذاتی مکان وچ رہن دتا جائے۔ عمران علی نے اپنی پُھپھو نوں بینتی کیتی کہ اوہناں دی ماں دا خیال رکھنا۔ مجرم دی پھانسی تے وصیت دی رپورٹ اے ٹی سی نوں گھل دتی گئی۔
