لاہور(پاکستان پوائنٹ نیوز17۔اکتوبر۔2018ء) نیب کورٹ وچ پیشی دے موقعے اُتے سابق وائس چانسلر پنجاب یونیورسٹی مجاہد کامران سنے ہور اُستاداں نوں ہتھکڑیاں لان دے معاملے اُتے ایڈیشنل ڈائریکٹر نیب لاہور نوں معطل کردتا گیا اے۔ تفصیل مطابق12اکتوبر نوں سابق وائس چانسلر پنجاب یونیورسٹی مجاہد کامران تے ہور اُستاداں نوں نیب کورٹ وچ پیش کیتا گیا۔
ایس موقعے تے مجاہد کامران سنے ہور اُستاداں نوں ہتھکڑی لائی گئی سی جیہدے اُتے نیب نوں ڈاڈھی تنقید دا نشانہ بنایا گیا۔ پرایہدے مگروں مجاہد کامران سنے ہور اُستاداں نوں ہتھکڑی لان دی اندرونی کہانی ساہمنے آئی۔ وسیلیاں نے دسیا کہ نیب دا کوئی افسر ایس انداز وچ ملزماں نوں پیش کرن دا مجاز نہیں اے۔ اُستاداں نوں پیش کرن دی ذمے واری پنجاب پولیس دی سی۔
نیب پراسیکیوٹر ملزماں خلاف صرف ثبوت دے سکدا ۔ وسیلیاں نے دسیا کہ اُستاداں دی پیشی ویلے نیب دا کوئی اہلکار موجود نہیں سی۔ پولیس وسیلیاں مطابق سکیورٹی دی وجہ توں ملزماں نوں ہتھکڑی لا کے پیش کیتا جاندا اے۔پر ہن نیب کورٹ وچ پیشی دے موقعے اُتے سابق وائس چانسلر پنجاب یونیورسٹی مجاہد کامران سنے ہور اُستاداں نوں ہتھکڑیاں لان دے معاملے اُتے ایڈیشنل ڈائریکٹر نیب لاہور نوں معطل کردتا گیا اے۔ محمد رفیق نوں چیئرمین نیب دی ہدایت اُتے معطل کیتا گیا۔
