لاہور(پاکستان پوائنٹ نیوز17۔اکتوبر۔2018ء) چیئرمین نیب نے اپوزیشن لیڈر قومی اسمبلی شہباز شریف ولوں لائے جان والے سارے الزاماں نوں رد کر دتا۔ تفصیل مطابق چیئرمین نیب جسٹس(ر) جاوید اقبال نے نیب دفتر دا دورہ کیتا، جتھے اوہناں نوں کئی مقدمیاں اُتے بریف کیتا گیا۔ چیئرمین نیب جسٹس (ر) جاوید اقبال نے آکھیا کہ نیب دا کسے سیاسی جماعت نال کوئی تعلق نہیں اے۔
نیب کسے انتقامی کارروائی اُتے یقین نہیں رکھدا۔ نیب دی پہلی تے آخری وابستگی پاکستان تے صرف پاکستان اے۔ نیب چیئرمین نے آکھیاکہ سارے مقدمیاں تے انکوائریاں نوں ٹھوس مقدمیاں تے ثبوتاں دی بنیاد اُتے منطفی انجام تیکر اپڑان لئی کوششاں کر رہے آں۔ نیب چیئرمین نے ایس دورے دوران سابق وائس چانسلر پنجاب یونیورسٹی سنے ہور اُستاداں نوں ہتھکڑیاں لان دے معاملے اُتے ایڈیشنل ڈائریکٹر نیب لاہور محمد رفیق نوں معطل وی کیتا۔
یاد رہوے کہ اج سپیکر اسد قیصر دی صدارت ہیٹھ اج قومی اسمبلی دا اجلاس ہویا۔ اجلاس دوران اپوزیشن لیڈر قومی اسمبلی و مسلم لیگ (ن) دے صدر شہباز شریف وی اپڑے۔ شہباز شریف نے قومی اسمبلی وچ تقریر کیتی۔ قومی اسمبلی دے اجلاس نال خطاب کردے ہوئے اپوزیشن لیڈر قومی اسمبلی شہباز شریف نے آکھیا کہ مینوں نیب نے آکھیا کہ خواجا آصف خلاف گواہی دیو۔ میں آکھیا کہ تُسیں مینوں وعدہ معاف گواہ بنن لئی سدیا اے؟خواجا آصف خلاف گواہی دی گل اُتے میں آکھیاکہ زبان سنبھال لوو۔
نیب نوں آکھیا کہ تہانوں خیال نہیں آؤندا ایہ بہت شرمناک گل اے۔ رپورٹ ملدی سی کہ نیب اندر میرے خلاف وعدہ معاف گواہ بنائے جا رہے نیں۔ نیب والے ہر کسے نوں آکھدے نیں کہ شہباز شریف خلاف گواہی دیو گے تے تہانوں چنگی نوکری دیواں گے۔ افسراں نوں آکھیا جاندا سی کہ شہباز شریف خلاف وعدہ معاف گواہ بن جاؤ تہانوں چیف سیکرٹری بنا دیواں گے، ایس گل دا یقین مینوں اودوں ہویا جدوں مینوں آپ وعدہ معاف گواہ بنن لئی آکھیا گیا۔
اوہناں نے ہور آکھیا کہ نیب تے پی ٹی آئی دا آپس وچ ڈونگھا رشتہ اے۔ چیئرمین نیب نے میری گرفتاری دے آرڈر 6جولائی توں 13جولائی دے وچکار دتے سن، اوس ویلے شیخ رشید نے آکھیا سی کہ شہباز شریف وی جیل دی ہوا کھان گے۔ اوہناں نے ایہ گل ایویں تے نہیں آکھی سی۔ بعد وچ پتا نہیں کیہ ہویا میری گرفتاری روکی گئی۔ اوہناں نے آکھیا کہ ہن جدوں ضمنی الیکشن دا موقع آیا تے گرفتاری دے فیصلے اُتے عمل کیتا گیا،تاں جے مرضی دے نتیجے حاصل کیتے جان، جیویں عام انتخابات وچ کیتے سن پر رب دا نظام اے کہ اوہ سیٹاں جو عام انتخابات وچ پی ٹی آئی دی جھولی وچ گئیاں، اوہی سیٹاں ضمنی الیکشن وچ اوہناں دے ہتھوں نکل گئیاں۔
