ملتان(پاکستان پوائنٹ نیوز16۔اکتوبر۔2018ء) لگاتار کسارے(خسارے) مگروں ملتان ائر پورٹ توں دبئی آپریشن بند کر دتا جائے گا، ایمریٹس دیاں ہفتہ وار 4اُڈاناں ملتان ائر پورٹ استعمال کر دیاں سن۔ تفصیل مطابق ملتان ملکی سطح دے نال نال صوبائی سطح اُتے وی اک اہم ائر پورٹ منیا جاندا اے جتھے روز ملک تے ملکوں باہر اُڈاناں جاندیاں نیں۔ ایس ائر پورٹ توں ملتان تے اوہدے نیڑے لگدے شہراں دے واسی فائدہ چُکدے نیں۔
پر کُجھ چِر توں ملتان ائر پورٹ نقصان وچ جا رہیا سی۔ ائر پورٹ انتظامیہ ولوں کسارے اُتے قابو پان لئی منصوبہ بندی کیتی گئی سی پر ایس حوالے نال ناکامی دا ساہمنا رہیا۔ تازہ اطلاع مطابق ملتان ائر پورٹ دی انتظامیہ نے لگاتار کسارے مگروں دبئی آپریشن بند کر ن دا فیصلا کیتا اے۔ جیہدے مگروں ملتان ائر پورٹ توں دبئی لئی اُڈاناں نہیں اُڈ سکن گیاں۔ ایمریٹس دیاں ہفتہ وار 4اُڈاناں ملتان ائر پورٹ ورتدیاں سن۔ ملتان ائر پورٹ دے ایس فیصلے مگروں ایمریٹس دا کارگو آپریشن متاثر ہوئے گا۔ ایس توں وکھ ملتان تے اوہدے نال لگدے شہراں دے واسیاں نوں وی ایس فیصلے دے نتیجے وچ اوکڑاں دا ساہمنا کرنا پئے گا۔
