لاہور(پاکستان پوائنٹ نیوز16۔اکتوبر۔2018ء) ڈی جی نیب لاہور سلیم شہزاد نوں عہدے توں ہٹان دے مطالبے دی قرارداد پنجاب اسمبلی سیکرٹریٹ وچ جمع کرواد تی گئی۔قرارداد مسلم لیگ (ن) دی رکن صوبائی اسمبلی عظمی بخاری ولوں جمع کروائی گئی۔ قرارداد دے متن وچ آکھیا گیا اے کہ ڈی جی نیب سلیم شہزاد دی ڈگری جعلی اے۔ اسٹیبلشمنٹ ڈویژن اسلام آباد نے ڈگریاں دی تصدیق لئی 20افسراں نوں نوٹسز جاری کیتے۔
ایہناں افسراں وچ اک ناں ڈی جی نیب سلیم شہزاد دا وی اے۔ جیہناں نے اج تیکر اپنی ڈگری دی تصدیق نہیں کروائی۔ ایس سلسلے وچ سپریم کورٹ آف پاکستان نے چیئرمین نیب نوں جواب لئی سدیا اے۔ ڈی جی نیب لاہور سلیم شہزاد خلاف جعلی ڈگری انکوائری تے کیس متعلقہ اداریاں وچ سنوائی ہیٹھ اے پر ڈی جی نیب اپنے عہدے دا فائدہ چُکدے ہوئے ایہناں انکوائریاں وچ پیش نہیں ہو رہے ۔ قراراداد وچ وفاقی حکومت توں منگ کیتی گئی اے کہ ڈی جی نیب لاہور سلیم شہزاد نوں اوہناں دے عہدے توں ہٹایا جائے۔
