لاہور(پاکستان پوائنٹ نیوز16۔اکتوبر۔2018ء) قبضہ مافیاگروپ دے سردار منشا بم دا آکھنا اے کہ مینوں پنجاب دی پولیس اُتے کوئی اعتبار نہیں اے، پنجاب پولیس مینوں وی جعلی مقابلے وچ مار دیوے گی۔ میڈیا رپورٹس مطابق قبضہ مافیا گروپ دے سردار منشا بم نوں انسداد دہشت گردی عدالت وچ پیش کیتا گیا۔ منشا بم نے عدالت وچ ایس گل دا خدشہ ظاہر کیتا کہ پنجاب پولیس اوہناں نوں جعلی پولیس مقابلے وچ مار سکدی اے۔
منشا بم نے ہور آکھیا کہ مینوں پنجاب پولیس اُتے کوئی بھروسہ نہیں اے تے میں پولیس توں بہت ڈرنا واں۔ میں پولیس دے ڈر توں ہن تیکر مفرور سی۔ میرا مقدمہ تے تفتیش کسے ایماندار پولیس افسر دے حوالے کیتی جائے۔ منشا بم نے ہور دسیا کہ میرے چار پُتر نیں تے اک پُتر پی ٹی آئی دے ٹکٹ اُتے چیئرمین دا الیکشن لڑ کے منتخب ہویا۔ یاد رہوے کہ لاہور وچ قبضہ مافیا دے سردار و ارباں رُپئے دے گھپلیاں وچ ملوث دہشت دی علامت سمجھے جان والے منشا بم نوں پچھلے دیہاڑے سپریم کورٹ دے احاطے توں گرفتار کیتا گیا سی۔
