پشاور(پاکستان پوائنٹ نیوز15۔اکتوبر۔2018ء) اج خیبرپختونخوا اسمبلی دا اجلاس ہویا۔ خیبرپختونخوا دی حکومت نے 613ارب دا بجٹ پیش کیتا۔ صوبائی وزیر خزانہ تیمور سلیم جھگڑا نے مالی سال 2018-19دا بجٹ پیش کیتا۔ صوبائی وزیر خزانہ دا تقریر کردے ہوئے آکھنا سی کہ پہلی وار تاریخ وچ سنگل حکومت لیائے۔ پی ٹی آئی نے روایتی سیاست توں ہٹ کے سیاست کیتی۔ اوکڑاں نیں پر اسیں گھبرانا نہیں اے۔
تحریک انصاف نے بجٹ دا 30فیصد مقامی حکومتاں نوں دتا۔ اوہناں نے آکھیا کہ صحت کارڈ دا گھیرا ہور ودھا رہے آں۔ ترقیاتی بجٹ لئی 180ارب رُپئے رکھے نیں۔ تعلیم اُتے 167ارب توں ودھ خرچ کیتے جان گے۔ نوجواناں نوں بغیر سود دے 5ارب رُپئے دے دتے جان گے۔ مالی سال دے بجٹ وچ 78ارب 65کروڑ صحت اُتے خرچ کیتے جان گے۔ 9ارب 60کروڑ بنیادی سکولاں اُتے خرچ کیتے جان گے۔ ضلعی حکومتاں لئی 23ارب رُپئے رکھے گئے نیں۔ امن و امان لئی 62.5ارب جدکہ زرعی ترقی لئی 24.20ارب رُپئے رکھے گئے نیں۔ٹرانسپورٹ لئی 39.6ارب رُپئے رکھے گئے نیں۔
