لاہور(پاکستان پوائنٹ نیوز15۔اکتوبر۔2018ء) احتساب عدالت نے سابق وزیر خزانہ اسحاق ڈار دے تِنوں پلاٹاں دی قرقی دا حکم دے دتا، عدالت نے اسحاق ڈار، بیوی تے بالاں دے تِنوں پلاٹ ویچن دا اختیار صوبائی حکومت نوں دے دتا، احتساب عدالت نے اسحاق ڈار نوں اشہتاری قرار دتا ہویا اے۔ میڈیا رپورٹس مطابق سابق وزیر خزانہ اسحاق ڈار دے تن پلاٹاں دی قرقی دا حکم دے دتا گیا اے۔
احتساب عدالت نے اسحاق ڈار دے پلاٹ ویچن دا اختیار صوبائی حکومت نوں دتااے۔ احتساب عدالت نے اسحاق ڈار دے دو، دو کنال دے تن پلاٹ ویچن دا حکم دتا۔ ایہناں پلاٹاں وچوں اک پلاٹ اسحاق ڈاردے پُتر علی مصطفی ڈار، اک پلاٹ اوہناں دی بیوی تبسم ڈار تے اک پلاٹ اسحاق ڈار دے ناں اُتے اے۔ یاد رہوے کہ 27ستمبر نوں نیب نے اسلام آباد ہائی کورٹ وچ دائر کیتی گئی درخاست وچ بینتی کیتی سی کہ (ن) لیگی رہنما و سابق وزیر خزانہ اسحاق ڈار دی ساری جائیداد ویچن دی اجازت دتی جائے۔
نیب ولوں درخاست سپیشل پراسیکیوٹر عمران شفیق ولوں دائر کیتی گئی سی۔ سپیشل پراسیکیوٹر عمران شفیق دی درخاست دے متن وچ آکھیا گیا سی کہ اسحاق ڈارنوں نیب تے عدالت اشتہاری قرار دے چکے نیں۔ اسحاق ڈار بیماری دا بہانہ بنا کے برطانیہ وچ نیں۔ اوہناں نوں باہر طلبی دے نوٹس وی جاری کیتے گئے پر اوہناں نے کوئی جواب نہیں دتا۔ ایس لئی اوہناں دی جائیداد ویچن دی اجازت دتی جائے۔
