لاہور(پاکستان پوائنٹ نیوز13۔اکتوبر۔2018ء) پاکستان الیکٹرانک میڈیا ریگولیٹری اتھارٹی پیمرا نے وزیر خزانہ اسد عمر تے وزیر مملکت برائے داخلا شہریار آفریدی بارے غلط خبر چلان اُتے دنیا نیوز تے جیو نیوز نوں نوٹس جاری کردتے، دو دناں وچ جواب جمع کروان دا حکم۔ میڈیا رپورٹس مطابق پاکستان الیکٹرانک میڈیا ریگولیٹری اتھارٹی پیمرا نے سماجی رابطے دی ویب سائٹ ٹویٹر اُتے جاری اپنے پیغام وچ آکھیا کہ جیہڑے ٹی وی چینلز نے پچھلے دیہاڑے وزیر اعظم عمران خان ولوں وزیر خزانہ اسد عمر دیاں معاشی پالیسیاں اُتے اطمینان دا اظہار نہ کرن تے وزیر مملکت برائے داخلا شہریار آفریدی ولوں اپنے گھر وچ سرکاری خرچے اُتے مرمت کروان لئی پیسے خرچ کرن دیاں خبراں چلائیاں سن اوہ بے بنیاد نیں۔
پیمرا ولوں آکھیا گیا کہ ذکر کیتیاں گئیاں خبراں نوں چھیتی رد کیتا جائے، نہیں تے ہور کارروائی کردے ہوئے چینلز دے لائسنس وی معطل کیتے جا سکدے نیں۔یاد رہوے کہ پچھلے دیہاڑے ذکر کیتے گئے نجی ٹی وی چینلز ولوں خبر آئی سی کہ وزیر اعظم عمران خان دی صدارت ہیٹھ پارٹی رہنماواں دا غیر رسمی مشاورتی اجلاس ہویا۔اجلاس وچ ملک دی چالو تے خراب معاشی صورتحال دا جائزہ لیا گیا۔
ایس موقعے تے وزیراعظم نے وفاقی وزیر خزانہ اسد عمر دیاں معاشی پالیسیاں اُتے اطمینان دا اظہار نہ کردے ہوئے خفگی دا اظہار کیتا۔ عمران خان نے آکھیا کہ وزیر خزانہ نوں اقتصادی صورتحال اُتے پیشگی منصوبہ بندی کرنی چاہیدی سی۔ اسد عمر نوں ہوم ورک پورا کر کے رکھنا چاہیدا۔ وزیراعظم نے آکھیا کہ پکی منصوبہ بندی نہ ہون دی وجہ توں عوامی ردعمل دا ساہمنا کرنا پیا۔
