لاہور(پاکستان پوائنٹ نیوز13۔اکتوبر۔2018ء) وفاقی وزیر اطلاعات و نشریات فواد حسین چودھری نے آکھیا اے کہ آئی ایم ایف کول جانا مجبوری سی، حالات ٹھیک ہوندے ای قرضہ واپس کر دیواں گے، جمہوریت نوں کوئی خطرہ نہیں، جمہوریت نوں خطرہ اودوں ہوندا اے جدوں اسیں وڈے لوکاں اُتے ہتھ پانے آں۔تفصیل مطابق اج عاصمہ جہانگیر کانفرنس وچ گل بات کردے ہوئے فواد چودھری دا آکھنا سی کہ عاصمہ جہانگیر دیاں جمہوریت تے عدلیہ دی آزادی لئی کوششاں نوں ہمیشہ یاد رکھیا جائے گا۔
اوہناں نے آکھیا کہ جمہوریت نوں خطرہ نہیں۔ جمہوریت نوں اودوں خطرہ ہوندا اے جدوں اسیں وڈے لوکاں اُتے ہتھ پانے آں۔ پاکستان وچ لوکاں نوں پُچھن دا حق ہوئے گا کہ اورنج لائن منصوبے وچ سریا کیہڑی کمپنی دا لگا؟جدوں گھر لُٹ جاندا اے تے تُسیں ڈاکوواں نوں پھڑن دی کوشش کردے او۔ اوہناں دا آکھنا سی کہ پاکستان بالکل ٹھیک پاسے جا رہیا اے تے ایس ویلے پاکستان وچ مڈل کلاس دا انقلاب جاری اے۔
پِنڈاں تے شہراں وچ رہن والیاں دا وی ملکی وسائل وچ برابر دا حق اے۔فواد چودھری دا آکھنا سی کہ عمران خان دی قیادت وچ ملک وچ تبدیلی آئی اے۔ اوہناں نے آکھیا کہ پاکستان وچ ووٹ دین والے نوں وی پتا اے کہ پچھلے دس سال ورھیاں نوں نہیں دُہرانا ۔ مڈل کلاس کسے وی سوسائٹی نوں تبدیل کردی اے۔اوہناں دا آکھنا سی کہ ایون فیلڈ وچ رہن والیاں تے ہسپتال وچ پئے روگیاں لئی وی قانون اِکو اے۔
اوہناں لوکاں دی وجہ توں جواناں نے گولیاں کھا کے شہادت حاصل کیتی۔ خیبرپختونخوا وچ اے این پی دے دور وچ جعلی بلٹ پروف جیکٹاں مُل لِتیاں گئیاں۔ فواد چودھری نے آکھیا کہ آئی ایم ایف کول جانامجبوری سی۔ حالات ٹھیک ہوندے ای قرضہ واپس کر دیواں گے۔ اک پاسے اسیں ڈاکوواں نوں پھڑ رہے آں تے دوجے پاسے قرضہ لیا اے۔ حالات ایہ نیں کہ دہی بھلے والے دے اکاؤنٹ وچوں وی کروڑاں نکل آؤندے نیں۔
