لاہور(پاکستان پوائنٹ نیوز13۔اکتوبر۔2018ء) چیف جسٹس آف سپریم کورٹ جسٹس ثاقب نثار نے آکھیا اے کہ ہتھکڑی مجاہد کامران تے پروفیسرز دی موت اے، میں اُستاد دی بے حرمتی برداشت نہیں کراں گا، کیوں نہ تہانوں وی ہتھکڑی لائی جائے، ڈی جی نیب عدالت وچ رُو پئے۔میڈیا رپورٹس مطابق چیف جسٹس سپریم کورٹ جسٹس ثاقب نثار دی سر براہی وچ پروفیسرز نوں نیب ولوں ہتھکڑیاں لان اُتے آپ نوٹس کیس دی سنوائی ہوئی۔
لاہور رجسٹری وچ سنوائی دوران ڈی جی نیب نے غلطی مندے ہوئے آکھیا کہ میں مجاہد کامران تے باقی سارے اُستاداں کولوں معافی منگ لئی اے۔ ڈی جی نیب عدالت وچ پیشی دوران رُو پئے۔ اوہناں نے آکھیا کہ مجاہد کامران نوں سکیورٹی خدشیاں پاروں ہتھکڑی لائی۔ چیف جسٹس سپریم کورٹ نے آکھیا کہ تہاڈے بارے چنگیاں گلاں سُنیاں پر ہن تہاڈیاں اکھاں وچ اتھرو آ گئے؟تُسیں قصووار او تے کیوں نہ تہاڈے خلاف مقدمہ درج کیتا جائے؟تُسیں ضمانتاں کراندے پھرو گے تے تہانوں ہتھکڑی لگے گی۔
چیف جسٹس نے پُچھیا کہ کیہ نیب نے کم کیتا؟کیہ کارروائی کیتی گئی اے؟جیہدے اُتے نیب پراسیکیوٹر نے آکھیا کہ اسیں کرپشن خلاف بہت کم کیتا۔چیف جسٹس نے آکھیا کہ ہتھکڑی مجاہد کامران تے پروفیسراں دی موت اے۔ جیہڑے اُستاداں نوں ہتھکڑیاں لائیاں گئیاں اوہ ایہ لوک نیں جیہناں نے بالاں نوں تعلیم دتی اے۔ میں اُستاد دی بے حرمتی برداشت نہیں کراں گا۔
چیف جسٹس نے آکھیا کہ کیس وچ تُسیں آکھیا کہ کوئی گل نہیں تن مہینیاں وچ چیف جسٹس چلا جائے گا۔ پر ہن تہاڈیاں اکھاں وچ اتھرو آ گئے نیں؟یاد رہوے کہ پچھلے دیہاڑے سابق وائس چانسلر پنجاب یونیورسٹی مجاہد کامران تے ہور اُستاداں نوں نیب کورٹ وچ پیش کیتا گیا۔ ایس موقعے تے مجاہد کامران سنے ہور اُستاداں نوں ہتھکڑی لائی گئی سی جیہدے اُتے نیب نوں ڈاڈھی تنقید دا نشانہ بنایا گیا۔
پرایہدے مگروں مجاہد کامران سنے ہور اُستاداں نوں ہتھکڑی لان دی اندرونی کہانی ساہمنے آئی۔ وسیلیاں نے دسیا کہ نیب دا کوئی افسر ایس انداز وچ ملزماں نوں پیش کرن دا مجاز نہیں اے۔ اُستاداں نوں پیش کرن دی ذمے واری پنجاب پولیس دی سی۔ نیب پراسیکیوٹر ملزماں خلاف صرف ثبوت دے سکدا ۔ وسیلیاں نے دسیا کہ اُستاداں دی پیشی ویلے نیب دا کوئی اہلکار موجود نہیں سی۔ پولیس وسیلیاں مطابق سکیورٹی دی وجہ توں ملزماں نوں ہتھکڑی لا کے پیش کیتا جاندا اے۔
