لاہور(پاکستان پوائنٹ نیوز13۔اکتوبر۔2018ء) سابق وائس چانسلر پنجاب یونیورسٹی مجاہد کامران تے ہور اُستاداں نوں پچھلے دیہاڑے نیب کورٹ وچ پیش کیتا گیا۔ ایس موقعے تے مجاہد کامران سنے ہور اُستاداں نوں ہتھکڑی لائی گئی سی جیہدے اُتے نیب نوں ڈاڈھی تنقید دا نشانہ بنایا گیا۔ پر ہن مجاہد کامران سنے ہور اُستاداں نوں ہتھکڑی لان دی اندرونی کہانی ساہمنے آ گئی اے۔
وسیلیاں نے دسیا کہ نیب دا کوئی افسر ایس انداز وچ ملزماں نوں پیش کرن دا مجاز نہیں اے۔ اُستاداں نوں پیش کرن دی ذمے واری پنجاب پولیس دی سی۔ نیب پراسیکیوٹر ملزماں خلاف صرف ثبوت دے سکدا ۔ وسیلیاں نے دسیا کہ اُستاداں دی پیشی ویلے نیب دا کوئی اہلکار موجود نہیں سی۔ پولیس وسیلیاں مطابق سکیورٹی دی وجہ توں ملزماں نوں ہتھکڑی لا کے پیش کیتا جاندا اے۔ یاد رہوے کہ مجاہد کامران سنے 6ملزماں نوں اج سویرے احتساب عدالت ساہمنے پیش کیتا گیا۔ نیب وچ پیشی ویلے مجاہد کامران سنے ہور اُستاداں نوں ہتھکڑی لا کے عدالت وچ پیش کیتا گیا۔ جتھے نیب نے ملزماں دا 10دناں دا جسمانی ریمانڈ لیا۔
