اسلام آباد(پاکستان پوائنٹ نیوز12۔اکتوبر۔2018ء) تحریک انصاف دے نوجوان نظریاتی کارکن پارٹی دا قیمتی اثاثہ نیں جیہناں نے تحریک انصاف دا سنیہا گھر گھر اپڑان وچ اہم کردار ادا کیتا۔ پاکستان تحریک انصاف اسلام آباد دے میڈیا سیل ولوں بیان مطابق ایہناں خیالاں دا اظہار پی ٹی آئی دے وائس چیئرمین تے وزیر خارجا شاہ محمود قریشی نے اسلام آباد وچ منعقدہ اک تقریب وچ کیتا جیہدا آہر مرکزی ڈپٹی سیکرٹری اطلاعات توصیف عباسی ولوں کیتا گیا۔
اوہناں دا ہور آکھنا سی کہ ملک وچ ہون والے عام انتخابات وچ نوجواناں نے تبدیلی دی سوچ نوں فروغ دین وچ اہم کردار ادا کیتا جیہدے نتیجے وچ عمران خان دی قیادت وچ اج پاکستان اندر لوکائی دی حقیقی معنیاں وچ ترجمان جماعت اقتدار وچ آ گئی اے۔ ایس موقعے تے توصیف عباسی نے نوجواناں دے انتخابی مہم وچ بھرپور کردار ادا کرن نوں سلاہندے ہوئے آکھیا کہ ملکی تاریخ وچ پہلی وار پاکستان دے نوجواناں نے اپنے بہتر مستقبل لئی تحریک انصاف دا پلیٹ فارم استعمال کیتا تے اپنی نمائندہ جماعت نوں کامیاب کروایا۔
