اسلام آباد(پاکستان پوائنٹ نیوز12۔اکتوبر۔2018ء) وزیر اعظم عمران خان نے اوورسیز پاکستانیاں خصوصی پیکج لیان دا اعلان کردے ہوئے آکھیا اے کہ اوورسیز پاکستانیاں دی ترسیلات زر لئی خصوصی سہولتاں دتیاں جان گیاں، بینکنگ چینل توں پیسے گھلن دی راہ وچ آن والیاں اوکڑاں دور کیتیاں جان گیاں، رکاوٹاں دور کرن نال ترسیلات زر20ارب ڈالر توں ودھا کے 40ارب ڈالر تیکر جا سکدیاں نیں۔
جمعے نوں سوشل میڈیا اُتے جاری اک بیان وچ اوہناں نے آکھیا کہ سویرے اوورسیز پاکستانیاں دے اک گروہ نال ملاقات دا موقع ملیا۔ اسیں بنکنگ چینلز توں ترسیلات زر دی حوصلا افزائی لئی اک خصوصی پیکج دا اعلان کرن جا رہے آں جیہدے ذریعے ترسیلات زر دی راہ وچ آن والیاں اوکڑاں دور کیتیاں جان گیاں۔ اوہناں نے آکھیا کہ اوورسیز پاکستانیاں دی ترسیلات زر لئی خصوصی سہولتاں دتیاں جان گیاں۔
بینکنگ چینل توں پیسے گھلن دی راہ وچ آن والیاں اوکڑاں دور ہو جان گیاں۔ رکاوٹاں دور کرن نال ترسیلات زر 20ارب ڈالر توں ودھا کے 40ارب ڈالر تیکر جا سکدیاں نیں۔ اوہناں نے آکھیا کہ اسیں اوورسیز پاکستانیاں نوں ملک واپسی دے موقعے اُتے امیگریشن دے حوالے نال پیش آن والیاں اوکڑاں دے خاتمے لئی وی خاص کم کر رہے آں۔
