لاہور(پاکستان پوائنٹ نیوز11۔اکتوبر۔2018ء) سابق وزیراعظم نواز شریف دی دھی مریم نواز والدہ دے چہلم مگروں سیاست وچ فیر متحرک ہون گیاں۔ میڈیا رپورٹس مطابق مریم نواز اپنی والدہ بیگم کلثوم نواز دے چہلم مگروں اک وار فیر سیاست وچ متحرک ہون گیاں۔ مریم نواز لئی پارٹی سیکرٹریٹ ماڈل ٹاؤن وچ اک وکھ دفتر وی بنایا جا رہیا اے جتھے اوہ روز بیٹھن گیاں۔
مریم نواز اپنے دفتر وچ بِہ کے پارٹی عہدیداراں نال ملاقاتاں وی کرن گیاں۔مریم نواز اپنی سوشل میڈیا سیل دی مانیٹرنگ کرن گیاں تے اک وار فیر سوشل میڈیا سیل نوں متحرک کرن گیاں۔ مریم نواز حلقہ این اے 127دی لوکائی نال وی ملاقاتاں کرن گیاں۔ دوجے پاسے اج احتساب عدالت وچ شہباز شریف دے داماد علی عمران دی جائیداد ضبط کرن بارے کیس دی سنوائی ہوئی۔
سنوائی دوران علی عمران دی جائیداد ضبط کرن دا حکم دتا گیا۔ یاد رہوے کہ نیب نے علی عمران خان صاف پانی کمپنی کیس وچ تحقیقات کیتیاں سن۔ جیہدے اُتے نیب نے عدالت توں بینتی کیتی سی کہ علی عمران نوں اشتہاری قرار دتا جائے تے اوہناں دی جائیداد ضبط کرن دا حکم وی دتا جائے۔پر اج احتساب عدالت نے عمران دی جائیداد ضبط کرن دا حکم نیب نوں دتا اے۔پر عدالت نے ہور شیئر ہولڈرز خلاف نیب کارروائی نوں روک دتا اے۔
