اسلام آباد(پاکستان پوائنٹ نیوز11۔اکتوبر۔2018ء) سپریم جوڈیشل کونسل نے جسٹس شوکت صدیقی نوں ہٹان دی سفارش کیتی اے۔ تفصیل مطابق سپریم کورٹ جوڈیشل کونسل نے جسٹس شوکت عزیز صدیقی دے حوالے نال اہم فیصلا دے دتا اے۔ سپریم کورٹ جوڈیشل کونسل نے جسٹس شوکت عزیز صدیقی نوں عہدے توں ہٹان دی سفارش کیتی اے۔ سپریم جوڈیشل کونسل نے اسلام آباد ہائی کورٹ دے سینئر جج جسٹس شوکت صدیقی نوں عہدے توں ہٹان دی سفارش صدر مملکت نوں گھل دتی اے۔
یاد رہوے جولائی دے مہینے وچ اسلام آباد ہائی کورٹ دے جج جسٹس شوکت صدیقی دا جھیڑوا(متنازعہ) بیان ساہمنے آیا سی۔ اسلام آباد ہائی کورٹ دے جج جسٹس شوکت عزیز صدیقی نے آکھیا سی کہ میں جدوں وی کوئی اہم فیصلا دینا واں اک مخصوص گروہ ولوں مہم چلا دتی جاندی اے۔ میرا دامن صاف اے ایس لئی سپریم جوڈیشل کونسل نوں درخاست دتی کہ میرا اوپن ٹرائل کرو۔ اوہناں نے آکھیا کہ مینوں نومبر وچ نہیں ستمبر وچ چیف جسٹس بنان دی آفر کیتی گئی پر ترقی لئی کوئی شارٹ کٹ نہیں اے۔
مینوں یقین دہانی کروائی گئی کہ تُسیں مرضی دے فیصلے کرو گے تے تہاڈا ریفرنس ختم کروا دیواں گے۔ اوہناں نے آکھیا کہ اج آزاد میڈیا وی اپنی آزادی گوا کے حوصلا ہار گیا اے۔ جج نوکری توں نہیں انصاف، عدل تے دلیری دا وکھالا کرن نال بندا اے۔ راولپنڈی ڈسٹرکٹ بارنال خطاب کردے ہوئے اسلام آباد ہائی کورٹ دے جج جسٹس شوکت عزیز صدیقی نے آکھیا سی کہ میری اپنے آپ نوں احتساب لئی پیش کرن دی لمے چِر توں خاہش سی۔
میرا احتساب میری بار ای کر سکدی اے۔ میرے اُتے اج تیکر کوئی کرپشن دا اک الزام وی ثابت نہیں ہو سکیا۔ آکھیا جاندا اے کہ ایہ اوہی جج صاحب نیں جیہناں اُتے کرپشن ریفرنس سنوائی ہیٹھ نیں۔ جے کرپشن نظر آئے تے بار میرے کولوں استعفے دی منگ کرے، میں مستعفی ہو جاواں گا۔ سارے وکیلاں نوں دعوت دینا واں کہ آکے ویکھن میرے اُتے کرپشن دے جو الزام لائے گئے نیں اوہناں وچ کِنی صداقت اے۔
جسٹس شوکت نے آکھیا کہ وکیل جرماں وچ کمی دی وجہ بنن، عدالت سہولت کار بنے۔ اوہناں دا کہنا سی کہ پاکستان داموازنہ امریکا یاں یورپ نال نہیں ہو سکدا۔ پاکستان دا موازانہ بھارت، بنگلا دیش یاں سری لنکا نال ہو سکدا اے۔ بھارت وچ اک دن لئی سیاسی عمل نہیں رُکیا کدی مارشل لاء نہیں لگا۔بھارت 2030وچ اک وڈی معیشت ہوئے گا تے اسیں پچھانہ جا رہے آں۔بھارت وچ وی کرپشن تے بدانتظامی اے پر فیر وی بھارت ترقی ول جا رہیا اے۔ چالو ملکی حالات دی 50فیصد ذمے واری عدلیہ تے باقی 50فیصد ہور اداریاں اُتے عائد ہوندی اے۔اوہناں دا کہنا سی کہ اجے قانون دے پڑھیاراں نوں پتا نہیں اے کہ جسٹس منیر نے کیہ کردار ادا کیتا سی؟جسٹس منیر دا کردار کُجھ چِر پچھوں ساہمنے آؤندا اے۔
