لاہور(پاکستان پوائنٹ نیوز11۔اکتوبر۔2018ء) سینئر صوبائی وزیر پنجاب عبدالعلیم خان نے پنجاب اسمبلی دے باہر نواز لیگ دے احتجاج اُتے ردعمل وچ آکھیا اے کہ شہباز شریف لئی وکھالا ’ڈِگا کھوتی توں۔۔تے غصہ کمہار اُتے‘والی گل اے۔کاش اینا نوں کوئی دسے کہ ایہ مقدمے نہ تے ایس حکومت وچ بنے نیں تے نہ ای کارروائی کرن والے اداریاں دا تعلق پنجاب حکومت توں اے۔
عبدالعلیم خان نے آکھیا کہ احتجاج دے ناں اُتے پنجاب اسمبلی اُتے دھاوا بولن والیاں نوں شرم آؤنی چاہیدی تے قوم نوں جواب دینا چاہیدا کہ کل تیکر دوجیاں نوں بھاشن دین والیاں نوں اج احتجاج دا کیوں خیال آ گیا۔ اوہناں نے ہور آکھیا کہ حمزہ شہباز حوصلا رکھو چھیتی اوہناں دے ہور کرتوت ساہمنے آن گے تے 10سال تیکر ملک نوں بے دردی نال لُٹن والیاں نوں ہر حال وچ جواب دینا پئے گا تے اوہناں دیاں جائیداداں ویچنیاں پین گیاں یاں اکاؤنٹ فریز کرنے پین گے۔
اوہناں نے آکھیا کہ ابا جی مگروں پُتر جی دی وی واری آن والی اے۔ قومی خزانے نوں لُٹن والیاں دا حشر عبرتناک ہوئے گا۔ اوہناں نے حمزہ شہباز دے خطاب اُتے ردعمل وچ آکھیا کہ کسے کرپٹ دے ریمانڈ خلاف منتخب ایوان دے باہر اجیہا احتجاج انوکھا کم اے۔ جے اینا ای شوق اے تے اوہناں نوں کنٹینر دینے آں نہیں تے مینار پاکستان ول جان تے ایہناں نوں اپنی سیاسی حیثیت دے آپے پتا لگ جائے گا۔
