اسلام آباد(پاکستان پوائنٹ نیوز10۔اکتوبر۔2018ء) سپریم کورٹ آف پاکستان وچ پٹرولیم وستاں اُتے لگے ٹیکساں بارے آپ نوٹس کیس دی سنوائی ہوئی۔ سنوائی دوران چیف جسٹس آف پاکستان جسٹس ثاقب نثار نے ملک وچ ڈالر دی اُچی اُڈان اُتے تشویش دا اظہار کیتا۔ چیف جسٹس نے آکھیا کہ ڈالر اُتے جا رہیا اے۔ جس حساب نال مہنگائی ودھ رہی اے لوک بہت پریشان نیں۔ اوہناں دا آکھنا سی کہ پٹرولیم وستاں اُتے ٹیکسز بہت ودھ گئے نیں۔
یاد رہوے کہ پچھلے دیہاڑے کاروبار شروع ہون اُتے ڈالر دی قیمت 137رُپئے ہوگئی۔ فاریکس ڈیلرز مطابق انٹر بنک مارکیٹ وچ ڈالردی قیمت وچ 9رُپئے 74پیسے دا وادھا ہویا، جیہدے مگروں ڈالر دی قیمت 137رُپئے ہو گئی اے۔ انٹر بنک مارکیٹ وچ ڈالر دی قیمت و چ وادھے مگروں ڈالر دی قیمت 124-25رُپئے توں ودھ کے 137رُپئے ہوئی جدکہ اوپن مارکیٹ وچ ڈالر دی قیمت وچ 5رُپئے دا وادھا ہویا، جیہدے مگروں اوپن مارکیٹ وچ ڈالر دی قیمت 134رُپئے ہو گئی۔ ڈالر دی قیمت وچ اک دن دے دوران 12رُپئے وادھے مگروں پٹرولیم وستاں دیاں قیمتاں وچ 15رُپئے فی لیٹر وادھے دا امکان اے۔
