لاہور(پاکستان پوائنٹ نیوز08۔اکتوبر۔2018ء) نیب لاہور نے سابق وزیر اعلا پنجاب شہباز شریف دے پُتر سلمان شہباز نوں سد لیا، سلمان شہباز کولوں آمدن توں ودھ اثاثیاں بارے پُچھیا جائے گا، سلمان شہباز نوں 10اکتبوبر نوں سدیا گیا اے۔ میڈیا رپورٹس مطابق نیب لاہور نے آشیانہ ہاؤس سکیم کیس وچ گرفتار اپوزیشن لیڈر شہباز شریف دے پُتر سلمان شہباز نوں وی انکوائری لئی سد لیا اے۔
سلمان شہباز نوں 10اکتوبر نوں سدیا گیا اے۔ سلمان شہباز کولوں نیب دی تحقیقاتی ٹیم آمدن توں ودھ اثاثیاں بارے سوال کرے گی۔ایس توں وکھ اج مسلم لیگ (ن) دے مرکزی سیکرٹریٹ ماڈل ٹاؤن وچ سنٹرل ایگزیکٹو کمیٹی دا اجلاس ہویا۔ اجلاس وچ مسلم لیگ (ن) دے قائد نواز شریف، شاہد خاقان عباسی، حمزہ شہباز شریف، پرویز ملک، شائستہ پرویز، آصف کرمانی، مشاہد اللہ خان، پرویز رشید سنے ہور رہنماواں نے رلت کیتی۔
اجلاس وچ ضمنی الیکشن دے حوالے نال صلاح کیتی گئی۔ اجلاس وچ پارٹی قیادت ولوں شہباز شریف دی بغیر جواز تے من گھڑت الزام دے نتیجے وچ گرفتاری دی نندیا(مذمت)کیتی گئی۔پارٹی رہنماواں نے ایس گل اُتے تشویش دا وکھالا کیتا کہ صدر (ن) لیگ و اپوزیشن لیڈر شہباز شریف نوں نیب نے صاف پانی کمپنی کیس وچ سد کے آشیانہ ہاؤس سکیم کیس وچ گرفتار کر لیا۔ ایس طرحاں سپیکر دی اجازت تے پارلیمنٹ نوں اعتماد وچ لِتے بغیر گرفتار کیتا گیا۔
مسلم لیگ (ن) نے شہاز شریف دی گرفتاری نوں سیاسی انتقامی کارروائی قرار دتا۔ ایس موقعے تے اجلاس وچ نواز شریف نوں پارٹی قیادت نے صلاح دتی کہ ہن کُھل کے میدان وچ نکلیا جائے۔ سی ای سی ارکان نے نواز شریف نوں مزاحمتی سیاست شروع کرن دا دی صلاح دتی۔ اوہناں نے آکھیا کہ ہن حالات انج دے بن گئے نیں کہ ہن سانوں باہر نکلنا پئے گا۔ جے اسیں باہر نہ نکلے تے انتقامی کارروائیاں ہورتیز ہوجان گیاں۔
