لاہور(پاکستان پوائنٹ نیوز08۔اکتوبر۔2018ء) واسا نے پین والے پانی دیاں قیمتاں وچ وادھا کر دتا، گھریلو ورتیندڑاں لئی پانی دے بِلاں وچ 20فیصد وادھا کر دتا گیا، ایم ڈی واسا زاہد عمر نے آکھیا کہ صاف پانی دی بچت لئی 12گھنٹے لوڈشیڈنگ کراں گے۔ میڈیا رپورٹس مطابق واسا نے لاہور وچ پین والے پانی دیاں قیمتاں ودھا دتیاں نیں۔ وادھے مگروں گھریلو ورتیندڑاں(صارفین) لئی پانی دی قیمت وچ 20فیصد وادھا کیتا گیا اے۔
ایم ڈی واسا زاہد عمرا دا آکھنا سی کہ صاف پانی دی بچت لئی 12گھنٹے لوڈشیڈنگ وی کراں گے۔ اوہناں نے آکھیا کہ گھریلو ورتیندڑاں دے پانی دے بِلاں وچ معمولی وادھا کیتا گیا۔ کمرشل اداریاں دے پانی دے ریٹس بُہتے ودھائے گئے نیں۔ اوہناں نے آکھیا کہ لاہور دے سارے کار سروس سٹیشناں لئی پانی دے کنکشنز کٹ دتے نیں۔ سروس سٹیشناں نوں ہدایت کیتی گئی اے کہ کار سروس سٹیشن گھٹ ڈونگھیائی توں پانی لے کے ورتن۔ سروس سٹیشن ورتے گئے پانی نوں فلٹر کر کے فیر ورتن۔ ایم ڈی واسا نے آکھیا کہ پی ایچ اے نہری یاں بارشی پانی نوں سٹور کر کے ورتے۔
