راولپنڈی(پاکستان پوائنٹ نیوز06۔اکتوبر۔2018ء) کسٹم عدالت نے کرنسی سمگلنگ کیس وچ ماڈل ایان علی دے ناقابل ضمانت وارنٹ گرفتاری جاری کر دتے نیں۔ راولپنڈی دی کسٹم عدالت دے جج ارشد بھٹہ نے ماڈل ایان علی خلاف کرنسی سمگلنگ کیس دی سنوائی کیتی، پر ہر وار دی طرحاں ماڈل اج وی پیش نہ ہوئیاں۔ سنوائی دوران کسٹم پراسیکیوٹر امین فیروز نے عدالت توں درخاست کیتی کہ ملزمہ ڈیڈھ سال توں غیر حاضر اے تے 50سنوائیاں اُتے وی پیش نہیں ہوئیاں۔
سنوائی دوران ملزمہ دے وکیل سردار لطیف کھوسہ وی عدالت وچ پیش نہ ہوئے بلکہ اوہناں دے جونیئر وکیل پیش ہوئے ۔ سنوائی دوران عدالت نے ایان علی دے پیش نہ ہون اُتے خفگی دا اظہار کیتا، جیہدے اُتے ملزمہ دے وکیل نے عارضی حاضری توں استثنا دی درخاست دیندے ہوئے آکھیا کہ اوہناں دی موکلہ بیمار اے تے عدالت وچ پیش نہیں ہو سکدی۔ عدالت نے وکیل کولوں پُچھیا کہ کیہ ملزمہ دا کوئی نواں میڈیکل سر ٹیفکیٹ تہاڈے کول ہے اے؟ہر پیشتی اُتے پرانے میڈیکل سر ٹیفکیٹ دی بنیاد اُتے ای حاضری توں استثنا نہیں دتی جا سکدی۔پر عدالت نے کسٹم پراسیکیوٹر دی درخاست اُتے ملزمہ دے ناقابل ضمانت وارنٹ گرفتاری جاری کردے ہوئے اوہناں نوں 22اکتوبر تیکر گرفتار کر کے عدالت وچ پیش کرن دا حکم دتا۔
