لاہور(پاکستان پوائنٹ نیوز06۔اکتوبر۔2018ء) سپریم کورٹ نے ماڈل ٹاؤن دُکھانت دے واقعے دیاں تحقیقات لئی نویں جوائنٹ انویسٹی گیشن ٹیم بنان دی درخاست اُتے پنجاب حکومت پراسیکوشن تے ملزماں نوں نوٹس جاری کر دتے جدکہ انسداد دہشت گردی دی عدالت نوں ماڈل ٹاؤن دُکھانت دے مقدمیاں وچ سرکاری افسراں نوں وی سدن دی ہدایت کیتی گئی اے۔ چیف جسٹس پاکستان جسٹس میاں ثاقب نثار دی سربراہی وچ دو رکنی بنچ نے سپریم کورٹ لاہور رجسٹری وچ ماڈل ٹاؤن دُکھانت دی متاثرہ کُڑی دی درخاست اُتے سنوائی کیتی تے عوامی تحریک دے سربراہ ڈاکٹر طاہر القادری روسٹرم اُتے آ گئے تے آکھیا کہ نویں جے آئی ٹی بنانا ضروری اے کیونکہ جو پہلی جے آئی ٹی بنائی گئی سی اوہدے وچ ملزم آپ ملزم سن تے غیر جانبدارانہ جے آئی ٹی توں انصاف دی آس نہیں۔
عوامی تحریک دے سربراہ نے اعتراض کیتا کہ جے آئی ٹی نے اپنی مرضی نال اِکو پاسے دیاں شہادتاں ریکارڈ کیتیاں نیں تے حکومتی دباء دی وجہ متاثرہ لوک جے آئی ساہمنے پیش نہیں ہوئے۔ چیف جسٹس نے ایس قانونی نقطے اُتے پُچھیا کہ کیہ استغاثہ دائر ہون مگروں نویں جے آئی ٹی بنائی جا سکدی اے۔ جیہدے اُتے طاہر القادری نے ایہ جواب پیش کیتا کہ ماضی وچ ماڈل ٹاؤن دُکھانت سنے ہور مقدمیاں اُتے فیر جے آئی ٹی بنائی گئی۔عدالت نے واقعے دیاں تحقیقات لئی نویں جوائنٹ انویسٹی گیش ٹیم بنان دی درخاست اُتے پنجاب حکومت پراسیکیوشن تے ملزماں نوں نوٹس جاری کردتے۔
