شہباز شریف دی گرفتاری مگروں نیب دفتر دی سکیورٹی ہائی الرٹ

شہباز شریف دی گرفتاری مگروں نیب دفتر دی سکیورٹی ہائی الرٹ

لاہور(پاکستان پوائنٹ نیوز05۔اکتوبر۔2018ء) شہباز شریف دی گرفتاری مگروں نیب لاہور دفتر دی سکیورٹی ہائی الرٹ کر دتی گئی، مسلم لیگ (ن) دے بھوترے کارکناں دے اکٹھے ہون کارن سکیورٹی وچ وادھے لئی ہور نفری سدی گئی۔ تفصیل مطابق اج آشیانہ ہاؤسنگ سکیم سکینڈل وچ سابق وزیر اعلا پنجاب شہباز شریف نوں گرفتار کر لیا گیا ۔مسلم لیگ (ن) نے وی پارٹی صدر شہباز شریف دی گرفتاری دی تصدیق کیتی۔

ترجمان مسلم لیگ (ن) مریم اورنگزیب نے آکھیا کہ پارٹی صدر شہباز شریف نوں گرفتار کر لیا گیا اے۔ شہباز شریف نوں اج آشیانہ ہاؤسنگ سکیم سکینڈل وچ گرفتار کیتا گیا اے۔ ڈی جی نیب نے وی سابق وزیر اعلا نوں گرفتار کرن دی تصدیق کیتی اے۔ سابق وزیر اعلا پنجاب اج تیجی وار عدالت وچ پیش ہوئے جتھے اوہناں ساہمنے کیس وچ حاصل کیتے جان والے ثبوت پیش کیتے گئے پر نیب دے ساہمنے شہباز شریف کوئی تسلی بخش جواب نہ دے سکے، جیہدے مگروں اوہناں نوں گرفتار کر لیا گیا ۔

پر ہن اطلاع مطابق لاہور دے علاقے ٹھوکر نیاز بیگ نیڑے موجود نیب لاہور دے ہیڈ کوارٹر دے باہر مسلم لیگ (ن) دے بھوترے کارکناں دے اکٹھے ہون کارن صورتحال کشیدہ ہو گئی اے۔ ممکنہ ہنگامی صورتحال نوں مُکھ رکھدے ہوئے لاہور دے ہیڈ کوارٹر دی سکیورٹی ہائی الرٹ کر دتی گئی اے۔ نیب لاہور دے ہیڈ کوارٹر دی وادھو سکیورٹی لئی پنجاب رینجرز تے پولیس دی وادھو نفری سدی گئی اے۔