لاہور(پاکستان پوائنٹ نیوز05۔اکتوبر۔2018ء) سابق وزیر اعلا پنجاب میاں شہباز شریف دی گرفتاری مگروں سعد رفیق دی گرفتاری دا وی امکان ظاہر کیتا جا رہیا اے۔ میڈیا رپورٹس وچ دسیا گیا اے کہ سابق وزیر ریلوے خواجا سعد رفیق نوں آن والے کُجھ دناں وچ گرفتار کر لیا جائے گا جدکہ وفاقی وزیر فواد چودھری وی ایس گل دا اشارہ دے چکے نیں کہ ایہ پہلی گرفتاری اے، اجے ہور وڈیاں گرفتاریاں ہونیاں نیں۔
سعد رفیق نوں آشیانہ ہاؤسنگ سکینڈل وچ گرفتار کرن دا امکان ظاہر کیتا جا رہیا اے۔میڈیا رپورٹس مطابق نیب نے خواجا سعد رفیق نوں 16اکتوبر نوں سدیا اے۔یاد رہوے کہ اج آشیانہ ہاؤسنگ سکیم سکینڈل وچ سابق وزیر اعلا پنجاب شہباز شریف نوں گرفتار کر لیا گیا ۔مسلم لیگ (ن) نے وی پارٹی صدر شہباز شریف دی گرفتاری دی تصدیق کیتی۔ ترجمان مسلم لیگ (ن) مریم اورنگزیب نے آکھیا کہ پارٹی صدر شہباز شریف نوں گرفتار کر لیا گیا اے۔
شہباز شریف نوں اج آشیانہ ہاؤسنگ سکیم سکینڈل وچ گرفتار کیتا گیا اے۔ ڈی جی نیب نے وی سابق وزیر اعلا نوں گرفتار کرن دی تصدیق کیتی اے۔ سابق وزیر اعلا پنجاب اج تیجی وار عدالت وچ پیش ہوئے جتھے اوہناں ساہمنے کیس وچ حاصل کیتے جان والے ثبوت پیش کیتے گئے پر نیب دے ساہمنے شہباز شریف کوئی تسلی بخش جواب نہ دے سکے، جیہدے مگروں اوہناں نوں گرفتار کر لیا گیا ۔
