لاہور(پاکستان پوائنٹ نیوز05۔اکتوبر۔2018ء) مشہور پرچا کار محمد مالک دا آکھنا اے کہ شہباز شریف دی گرفتاری نال پارٹی دی سیاست وچ شدت آئے گی۔ تفصیل مطابق اج مسلم لیگ (ن) دے صدر شہباز شریف نوں گرفتار کیتا گیا اے۔ نیب نے شہباز شریف نوں اج گرفتار کیتا جیہدی تصدیق مسلم لیگ (ن) دی ترجمان مریم اورنگزیب نے وی کیتی اے۔ ایس بارے مشہور پرچا کار و تجزیہ کار محمد مالک دا آکھنا سی کہ مسلم لیگ (ن) وچ ہن اک نواں بیانیہ چل رہیا سی کہ اداریاں نال بنا کے چلو تے اداریاں نال جھیڑا نہ کرو۔
پر ایہ نقطہ اج دے بعد اک وار فیر کمزور ہو جائے گا۔ تے ہن مسلم لیگ (ن) دی جماعت وچ انتقام نظر آ رہیا اے تے مسلم لیگ (ن) دی سیاست وچ شدت آئے گی۔ ہن حکومت لئی وی اوکڑاں(مشکلات) پیدا ہو جان گیاں کیونکہ ہن جو وڈیاں جماعتاں نیں اوہناں وچوں پیپلز پارٹی وی کندھ نال لگی ہوئی اے۔ اوہناں دا کہنا سی کہ پیپلز پارٹی دے مقابلے وچ (ن) لیگ وچ دو گروپ سن اک گروپ جو نواز شریف تے مریم نواز والا سی، جو آکھدا سی اداریاں نال سخت رویہ رکھنا چاہیدا تے دوجا گروپ جو اداریاں نال رلکے ٹُرنا چاہندا سی۔
شہباز شریف دی گرفتاری بھاویں جِنے روز لئی وی ہوئے پر ہن شہباز شریف دا بیانیہ کمزور ہو گیا اے تے اوہناں دی گرفتاری مگروں شہباز شریف دے بنانیے دی پارٹی وچ کوئی تھاں نہیں رہی۔ ہن شہباز شریف نوں آکھیا جائے گا کہ تُسیں تے آکھدے سو کہ اداریاں نال ٹُرو تے ہن ویکھو اوہناں نے تہانوں وی گرفتار کر لیا۔
