لاہور(پاکستان پوائنٹ نیوز05۔اکتوبر۔2018ء) پیپلز پارٹی دے مرکزی رہنما و قومی اسمبلی وچ سابق اپوزیشن لیڈر خورشید شاہ نے شہباز شریف دی گرفتاری دی نندیا(مذمت) کیتی اے۔ اوہناں نے آکھیا کہ شہباز شریف دی ایس انداز وچ گرفتاری پارلیمان دی توہین اے۔ حکومت انتقامی کارروائی توں پرہیز کرے۔ اوہناں نے قومی اسمبلی وچ اپوزیشن لیڈر شہباز شریف دی گرفتاری اُتے اپنے ردعمل وچ آکھیا کہ شہباز شریف دی ایس انداز وچ گرفتاری پارلیمان دی توہین اے۔
اوہناں دا آکھنا سی کہ شہباز شریف قائد حزب اختلاف نیں، اوہناں نوں ایس طرحاں گرفتار نہیں کرنا چاہیدا۔ خورشید شاہ نے آکھیا کہ سیاسی قیادت دے سارے مقدمیاں اُتے پارلیمنٹ نوں پہلے اعتماد وچ لیا جائے۔ پارلیمانی کمیٹی وچ سارے مقدمیاں دا جائزہ لیا جائے۔ اوہناں نے آکھیا کہ ایس طرحاں دیاں گرفتاریاں توں سیاسی انتقام دی بُو آؤندی اے۔حکومت انتقامی کارروائیاں توں پرہیز کرے۔
اوہناں نے آکھیا کہ 100دناں دے پروگرام دی ناکامی اُتے حکومت انج دے کم کر رہی اے۔ایس توں وکھ رانا ثناا للہ نے شہباز شریف دی گرفتاری اُتے اپنے ردعمل وچ آکھیا کہ شہباز شریف خلاف انتقامی کارروائی کیتی گئی۔ شہباز شریف نوں الیکشن توں 10دن مگروں وی گرفتار کیتا جا سکداسی۔ ضمنی الیکشن اُتے اثر انداز ہون لئی انج دیاں کارروائیاں کیتیاں جا رہیاں نیں۔
اوہناں نے آکھیا کہ ’ابھی ابتدائے عشق‘ نوں اسیں ویکھ رہے آں پر ’انتہائے عشق‘اسیں کراں گے۔ 12اکتوبر1999ء توں ودھ کے ایہ کُجھ نہیں کر سکدے۔ ایہ بانہواں اسیں آزمائیاں نیں۔ اوہناں نے آکھیا کہ آشیانہ ہاؤسنگ سکیم بارے الزام صرف الزام نیں۔ایہدے وچ حکومتی فنڈنگ اجے ہوئی ای نہیں۔ دوجے پاسے سابق وفاقی وزیر خرم دستگیر نے شہباز شریف دی گرفتاری اُتے اپنے ردعمل وچ آکھیا کہ ایس طرحاں دے اوچھے ہتھکنڈیاں نال اپوزیشن لیڈر شہباز شریف نوں گرفتار کر کے اپوزیشن نوں مرعوب نہیں کیتا جا سکدا۔
اوہناں نے آکھیاکہ ایہ لوک شہباز شریف نوں چھیتی رہا کرن اُتے مجبور ہو جان گے۔ اوہناں دا آکھنا سی کہ ہُن لوکائی اُٹھے گی تے آپ انصاف کرے گے۔یاد رہوے کہ اج آشیانہ ہاؤسنگ سکیم سکینڈل وچ سابق وزیر اعلا پنجاب شہباز شریف نوں گرفتار کر لیا گیا ۔مسلم لیگ (ن) نے وی پارٹی صدر شہباز شریف دی گرفتاری دی تصدیق کیتی اے۔ ترجمان مسلم لیگ (ن) مریم اورنگزیب نے آکھیا کہ پارٹی صدر شہباز شریف نوں گرفتار کر لیا گیا اے۔
شہباز شریف نوں اج آشیانہ ہاؤسنگ سکیم سکینڈل وچ گرفتار کیتا گیا اے۔ ڈی جی نیب نے وی سابق وزیر اعلا نوں گرفتار کرن دی تصدیق کر دتی اے۔ سابق وزیر اعلا پنجاب اج تیجی وار عدالت وچ پیش ہوئے جتھے اوہناں ساہمنے کیس وچ حاصل کیتے جان والے ثبوت پیش کیتے گئے پر نیب دے ساہمنے شہباز شریف کوئی تسلی بخش جواب نہ دے سکے، جیہدے مگروں اوہناں نوں گرفتار کر لیا گیا ۔
