لاہور(پاکستان پوائنٹ نیوز04۔اکتوبر۔2018ء) صوبائی وزیر محمود الرشید دا پُتر غیر اخلاقی حرکتاں کردا پھڑیا گیا، مداخلت کرن اُتے پولیس نوں دھمکیاں، لاہور پولیس نے مقدمہ درج کر لیا۔ میڈیا رپورٹس وچ دسیا گیا اے کہ لاہور دے علاقے غالب مارکیٹ وچ صوبائی وزیر ہاؤسنگ میاں محمود الرشید دے پُتر خلاف مقدمہ درج کر لیا گیا اے۔ مقدمہ پولیس نوں دھمکیاں تے کار سرکار وچ دخل دین اُتے درج کیتا گیا۔
رپورٹس وچ ہور دسیا گیا اے کہ محمود الرشید دا پُتر حسن رشید کُڑی نال گڈی وچ موجود سی تے دوویں غیر اخلاقی حرکت وچ رُجھے (مصروف) سن پرجدوں پولیس نے پُچھیا تے ملزم دھمکیاں دین لگا تے کُجھ لوکاں نوں اوتھے سد کے پولیس اہلکاراں نوں اغوا وی کیتا گیا تے کسے ہور علاقے وچ جا کے چھڈ دتا گیا۔ جدوں معاملا پولیس حکام تیکر اپڑیا تے پولیس نے مقدمہ درج کر لیا۔
رپورٹس وچ ہور دسیا گیا کہ جدوں حسن رشید کول موجود گڈی نوں چیک کیتا گیا تے پتا لگا کہ ایہ صوبائی وزیر دے پُتر دے ناں توں رجسٹرڈ اے، ایس لئی اجے تیکر ایس گل دی تصدیق نہیں ہو سکی کہ میاں محمود الرشید دا پُتر ای گڈی وچ موجود سی یاں گڈی اوہناں دے ناں توں رجسٹرڈ سی۔ حسن رشید نے کارروائی کرن اُتے پولیس نوں دھمکیاں دتیاں۔ پر ہن غالب مارکیٹ وچ حسن رشید خلاف مقدمہ درج کر لیا گیا اے۔دوجے پاسے ایس بارے میاں محمود الرشید و لوں اجے تیکر کوئی موقف ساہمنے نہیں آیا۔
