خلاف ضابطہ اشتہار جاری کرن داکیس :سابق وزیر اعلا شہباز شریف نے 55 لکھ دا چیک جمع کروا دِتا: وسیلے

ایہ قانون دی حکمرانی اے‘ شہباز شریف دے رضا کارانہ اقدامات نُوں سلاہندے آں:چیف جسٹس دے ریمارکس

خلاف ضابطہ اشتہار جاری کرن داکیس :سابق وزیر اعلا شہباز شریف نے 55 لکھ دا چیک جمع کروا دِتا: وسیلے
 ایہ قانون دی حکمرانی اے‘ شہباز شریف دے رضا کارانہ اقدامات نُوں سلاہندے آں:چیف جسٹس دے ریمارکس

اسلام آباد(پاکستان پوائنٹ نیوز02۔اکتوبر۔2018ء) چیف جسٹس آف پاکستان جسٹس ثاقب نثار نے خلاف ضابطہ اشتہار جاری کرن دے کیس وچ 55 لکھ رُپئے دا چیک جمع کروان اُتے سابق وزیر اعلا پنجاب شہباز شریف دی تعریف کردیاں ہویاں ریمارکس دِتے کہ ایہ قانون دی حکمرانی اے‘ شہباز شریف دے رضا کارانہ اقدامات نُوں سلاہندے آں۔ منگل والے دن سابق پنجاب سرکار ولوں خلاف ضابطہ اشتہارات دے اجرا بارے کیس دی سنوائی ہوئی۔

سابق وزیر اعلا دے وکیل نے 55 لکھ رُپئے دا نواں چیک عدالت وچ پیش کیتا تے پرانا چیک واپس کرن دی استدعا کیتی جیہدے اُتے چیف جسٹس نے کہیا کہ تہانوں پرانا چیک مل جاوے گا تے پُچھیا کہ کیہ ایہ 55 لکھ دا چیک ڈیم فنڈز وچ جاوے گا یاں قومی خزانے وچ؟ جیہدے اُتے وکیل نے کہیا کہ ایہ عدالت دی مرضی اے۔ شہباز شریف بھاشا ڈیم دی مکمل حمایت کردے نیں‘ پچھلے دور حکومت وچ بھاشا ڈیم لئی 122 ارب رُپئے مختص کیتے‘ شہباز شریف دے وکیل نے عدالت نُوں دَسیا کہ کے پی کے تے سندھ حکومت نے وی اپنے لیڈراں دی تصویر والے اشتہار دِتے نیں‘ جیہدے اُتے چیف جسٹس نے نوٹس لیندیاں ہویاں خیبر پختونخوا تے سندھ حکومت نُوں نوٹس جاری کر دِتے۔