اسلام آباد (پاکستان پوائنٹ نیوز01۔اکتوبر۔2018ء) پاکستان نے سعودی عرب توں ادھار تیل لین لئی باقاعدہ درخاست کر دتی،پاکستان نوں سعودی عرب توں ہنگامی بنیاداں اُتے 3توں5ارب ڈالر تیکر دا ادھار تیل ملن دا امکان۔ تفصیل مطابق وزیر اعظم عمران خان دے دورہ سعودی عرب مگروں دوناں ملکاں دے تعلقات وچ وڈا بریک تھرو ہویا اے۔ سعودی عرب نے پاک چین اقتصادی راہداری منصوبے وچ رلت دے نال نال پاکستان وچ ارباں ڈالرز دی سرمایہ کاری وچ دلچسپی دا اظہار کیتا اے۔
سعودی عرب پاک چین اقتصادی راہداری منصوبے دا حصہ بندے ہوئے پاکستان دے سمندری شہر گوادر وچ آئل سٹی دی اُساری وچ دلچسپی رکھدا اے۔ چین نے وی سعودی عرب دی سی پیک منصوبے وچ رلت اُتے رضا مندی ظاہر کر دتی اے۔ دوجے پاسے وسیلیاں مطابق پاکستان دی ایس ویلے ہنگامی لوڑ ادھار تیل دی فراہمی اے۔ حکومت نے ایس سلسلے وچ سعودی عرب نوں باقاعدہ درخاست وی کر دتی اے۔ حکومت پاکستان نے سعودی عرب نوں درخاست کیتی اے کہ 90دناں لئی ادھار تیل دتا جائے۔ وسیلیاں مطابق ایس سلسلے وچ سعودی عرب پاکستان نوں مدد دین لئی وی تیار اے۔ پاکستان نوں سعودی عرب توں ہنگامی بنیاداں اُتے 3توں5ارب ڈالر تیکر دا ادھار تیل ملن دا امکان اے۔
