اسلام آباد(پاکستان پوائنٹ نیوز01۔اکتوبر۔2018ء) سابق وزیر خزانا اسحاق ڈار دی جائیداد نیلامی دا فیصلا کل سُنایا جاوے گا۔ نیب ولوں احتساب عدالت وچ دائر ریفرنس اُتے احتساب جج کورٹ روم نمبر اِک محمد بشیرنے اج فریقاں دے وکیلاں دے دلائل سُنن مگروں فیصلا محفوظ کر لیا سی تے فریقاں دے وکیلاں نوں فیصلا 12 وجے سُنن دا آکھیا پر بعد وچ عدالتی اہلکار نے دسیا کہ اسحاق ڈاردی جائیداد نیلامی دا فیصلا کل سُنایا جاوے گا۔
نیب پراسیکیوٹر عمران شفیق نے عدالت وچ دلائل دیندے ہوئے کہنا سی کہ عدالت اسحاق ڈار دیاں ضبط جائیداداں نیلام کرن دا حکم دیوے۔یاد رہوے کہ 27ستمبر نوں نیب نے اسلام آباد ہائی کورٹ وچ دائر کیتی گئی درخاست وچ بینتی کیتی سی کہ (ن) لیگی رہنما و سابق وزیر خزانہ اسحاق ڈار دی ساری جائیداد ویچن دی اجازت دتی جائے۔نیب ولوں درخاست سپیشل پراسیکیوٹر عمران شفیق ولوں دائر کیتی گئی سی۔
سپیشل پراسیکیوٹر عمران شفیق دی درخاست دے متن وچ آکھیا گیا سی کہ اسحاق ڈارنوں نیب تے عدالت اشتہاری قرار دے چکے نیں۔ اسحاق ڈار بیماری دا بہانہ بنا کے برطانیہ وچ نیں۔ اوہناں نوں باہر طلبی دے نوٹس وی جاری کیتے گئے پر اوہناں نے کوئی جواب نہیں دتا۔ ایس لئی اوہناں دی جائیداد ویچن دی اجازت دتی جائے۔
